Հայ խաղաղպահները վնասազերծել են օդանավակայան պայթեցնող տեռորիստների. Արթուր Սիմոնյան

Մայիսի 29-ը նշվում է որպես Խաղաղապահների միջազգային օր:

ՀՀ ԶՈՒ խաղաղապահ բրիգադի հրամանատար, գեներալ-մայոր Արթուր Սիմոնյանն, ամփոփելով հայ խաղաղապահների անցած ուղին, ձեռքբերումներն ու արձանագրած հաջողությունները, նշում է, որ ՀՀ-ն որպես ՄԱԿ-ի լիիրավ անդամ՝ պատրաստակամություն է հայտնել մասնակցելու միջազգային խաղաղապահ առաքելությանը և ստեղծված խաղաղապահ բրիգադը 2007 թվականից առ այսօր՝ իր հրամանատարությամբ մարտական պատրաստություն է իրականացնում:

ԸՍՏ ՊՆ պաշտոնյայի՝ խաղաղապահ բրիգադը մասնակցում է ՀՀ ԶՈՒ բոլոր խնդիրների կատարմանը և իրականացվող լրացուցիչ վարժանքների շնորհիվ իրականացնում են նաև խաղաղապահ առաքելություն արտասահմանյան զորամասերում և ՆԱՏՕ-ում՝ ՄԱԿ-ի պահանջներին համապատասխան: 

Խոսելով հայ խաղաղապահների առաքելությունների մասին՝ Արթուր Սիմոնյանը նշեց, որ հայ խաղաղապահներն այս պահին իրականացնում են Կոսովոյի օդանավակայանի անվտանգությունը, մյուս առաքելությունը եղել է Իրաքում, որտեղ ծառայություն է իրակականացրել 368 հայ խաղաղապահ: «2012 թվականից հայ խաղաղապահները տեղափոխվել են Քաբուլ և իրականացնում են այդ տարածքի անցագրային կետերի անվտանգությունը, քանի որ հենց անցագրային կետերում են գործում մահապարտները: Նշեմ, որ մեր զինծառայողները երկու տեռորիստների են հայտնաբերել Քունդուզի օդանավակայանի տարածքում, որտեղ պետք է ժամանեին օտարերկրյա բարձրաստիճան պաշտոնյաներ»:

Արթուր Սիմոնյանը հավելեց նաև, որ հայ խաղաղապահները պատրաստվում են Գերմանիայում և Ղազախստանում մասնակցելու բազմազգ զորավարժությանը, իսկ Հայաստանում կմասնակցեն խաղաղապահության թեմայով լայնամասշտաբ զորավարժությանը: 

Գեներալ-մայորի փոխանցմամբ՝ ՆԱՏՕ-ի մեր գործընկերները ցանկություն են հայտնել մեծացնել մեր գումարտակների թիվը և այս պահին սպասում ենք մեր բրիգադների տեխնիկական հագեցվածությանը, որից հետո մենք ավելի մեծ քանակով խաղաղապահներ կունենանք: «Լիբանանում նույնիսկ իտալացի գեներալներն են պատմում հայ խաղաղապահների արիական ոգու մասին, անգամ մի առիթով իտալացի գեներալը նշել էր, որ կուզենար՝ իր հրամանատաության տակ նման զինվորներ լինեին»:

Պաշտոնյայի փոխանցմամբ՝ իրենց խիզախության և պրոֆեսիանոլիզմի համար հայ խաղաղապահներին անգամ շռայլ պարգևատրումների են արժանացրել ամենաժլատ համարվող գերմանացիները: «Մենք յուրահատուկ ազգ ենք և մեր զինծառայողներն արտասահմանում մեր ազգի դեսպաններն են, անգամ օտար աշխարհում պարել են Բերդ պարը և օտարներին մեր մշակույթը ներկայացրել»,- եզրափակեց Արթուր Սիմոնյանը:  

Աղավնի Սուքիասյան