Կառավարության նոր «գյուտը»

Այն, որ Հայաստանն այսօր առավել քան երբևէ օտարերկրյա ներդրումների կարիք է զգում, այն, որ հարևան Վրաստանում ու թշնամական Ադրբեջանում նմանատիպ ներդրումների ծավալը Հայաստանում կատարվող նույնատիպ ներդրումների ծավալին գերազազանցում է մոտ 10 անգամ, հայտնի իրողություն է: Թե հատկապես ինչով է պայմանավորված մեր երկրի գրավչության անկումն օտարերկրյա ներդրողների աչքում, խոսել կարելի է երկար. այդ պատճառներն ունեն թե՛ օբյեկտիվ ու թե՛ սուբյեկտիվ բնույթ:

Սակայն ներկա կառավարության առջև ծառացած հարցերի հարցը ոչ այնքան այդ պատճառների ուսումնասիրությունն է, որքան դրանք վերացնելը, քանի որ եթե այսպես ևս մի քանի տարի շարունակվի, ապա Հայաստանն ուղղակի կսննկանա՝ չունենալով ոչ մի միջոց գոնե թոշակներ վճարելու կամ բյուջետային աշխատողների աշխատավարձերը տալու համար: Ստեղծված իրավիճակից ելքերն իրականում հայտնի են: Դրանց շարքերում առաջնայինն այն՝ սուբյեկտիվ բնույթ կրող թերությունների վերացումն է, որոնք բնորոշ են մեր երկրին արդեն տասնամյակներ ի վեր՝ հավասար դաշտ, ներդրումների անձեռնմխելիության երաշխավորում և այլն: Մի խոսքով՝ հեծանիվ հայտնաբերելու կարիք ՀՀ կառավարությունը չունի, անհրաժեշտ է ընդամենը կամք ու վճռակամություն:

Պարզվում է, սակայն, փոխարենը շուտափույթ կերպով այս խնդիրներին լուծում տալու, Կառավարությունը փորձում է հարցին մոտենալ շատ ավելի ստեղծագործաբար. ապագայում ՀՀ կառավարությունը, որպես շնորհակալություն օտարերկրյա ներդրողներին Հայաստանի նկատմամբ անտարբեր չգտնվելու համար, հնարավոր է ՀՀ քաղաքացիություն շնորհի: Այսինքն՝ յուրաքանչյուր օտարերկյա քաղաքացի անհատ, ով որոշակի գումարից ավել գումար ներդնի մեր երկրում, կարժանանա ՀՀ քաղաքացի լինելու պատվին: Այո՛, ինչ-ինչ, բայց հայրենի կառավարությանը թերարժեքության բարդույթի մեջ մեղադրել ոչ մի կերպ չես կարող. մարդիկ արժևորում են ՀՀ անձնագիրն, ինչը, բնականաբար, հրաշալի է: Սակայն այստեղ մեկ այլ, շատ ավելի հետաքրքրիր հարց է առաջ գալիս. արդյոք ՀՀ քաղաքացիություն շնորհելը բավարար ստիմուլ կարո՞ղ է համարվել Հայաստան փող բերելու համար:

Ի՞նչ կարող է տալ ՀՀ քաղաքացիությունը ԱՄՆ քաղաքացի հանդիսացող բնիկ ամերիկացուն կամ Փարիզի պորտում ծնված ֆրանսիացուն…

Ցավոք, այս ամենը գեթ մեկ բանի մասին է վկայում. կա՛մ Կառավարությունը խնդրի էությունը լիովին չի հասկացել, կա՛մ հակված է բացառապես կոսմետիկ միջոցներ կիրառել՝ մարդկանց աչքերին թոզ փչելու ժանրից: Ինչ-որ բան մեզ հուշում է, որ երկրորդ տարբերակն ավելի հավանական է:

 Դավիթ ԲԱԲԱՆՈՎ