Գեւորգ Մհերյանը Սեւանի գաղութում նախ գանտելով, ապա դանակով հարձակվել է դատապարտյալների վրա

Նոյեմբերի 15-ին արտակարգ միջադեպ է տեղի ունեցել ՀՀ Արդարադատության նախարարության «Սևան» քրեակատարողական հիմնարկում (գաղութ):

Ինչպես ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, «Սևան» ՔԿՀ-ից ոստիկանության Հրազդանի բաժին հայտնել են, որ նոյեմբերի 15-ին առավոտյան ժամը 7-ի սահմաններում «Սևան» ՔԿՀ-ի բուժմասում 53-ամյա Գևորգ Մհերյանը, նախկինում 3 անգամ դատված, որը 2009-ի ապրիլի 3-ին ՀՀ Քրեական օրենսգրքի 266 հոդված 2-րդ մասի 2-րդ կետով և 268 հոդվածի 3-րդ մասի հատկանիշներով դատապարտվել է 8 տարվա ազատազրկման, դեռևս անհայտ հանգամանքներում սպորտային ծանրաքարով («գանտել») հարվածել է նույն գաղութի բուժմասում քնած դատապարտյալ, 38-ամյա Մհեր Փիրումյանին, որը նախկինում երկու անգամ եղել է դատապարտված, իսկ վերջին անգամ դատապարտվել է 2008-ի օգոստոսի 11-ին ՀՀ քր.օրի 175 հոդվածի 2-րդ մասով 8 տարվա ազատազրկման: Այդ ամենից հետո Գ. Մհերյանը ինքնաշեն դանակով հարվածել է նույն մասնաշենքում պահվող դատապարտյալ, նախկինում 8 անգամ դատված, 60-ամյա Էդիկ Կարապետյանին: Վերջին անգամ 2008-ի հունիսի 25-ին Է. Կարապետյանը դատապարտվել է 8 տարվա ազատազրկման ՀՀ քր.օրի 266 հոդվածի 3-րդ մասի 2-րդ կետով: Փաստի առթիվ ոստիկանության Կոտայքի մարզի քննչական բաժնում սկսվել է հետաքննություն, նշանակվել է դատաբժշկական փորձաքննություն: