Բա դա ասելո՞ւ բան է, 600 հազար դրամի հետ կատակ ե՞ն անում. Դավիթ Գասպարյան

Ազգային ժողովում արտահերթ կարգով քննարկվում է օրենքի նախագիծ, որով առաջարկվում է ՀՀ հատուկ քննչական ծառայության և ՀՀ քննչական կոմիտեի ծառայողի պաշտոն զբաղեցնող անձանց, ովքեր համապատասխանաբար 2014 և 2017 թվականների հուլիսի 1-ի դրությամբ առնվազն 20 տարվա մասնագիտական աշխատանքային ստաժ ունեն, կենսաթոշակ սահմանել 600 հազար դրամը: 

ԼՈւՐԵՐ.com-ի հետ զրույցում գրականագետ Դավիթ Գասպարյան այս օրենքի նախագիծը հասարակության մեջ անընդունելի շերտավորման հիմք համարեց՝ նշելով, որ այդ կերպ մեր հասարակությունը կբաժանեն  արտոնյալների և ոչ արտոնյալների. «Բավական է ստեղծենք արտոնյալ շերտեր: Ուսուցչից, բժշկից, գրողից  սկսած՝ բոլորի համար էլ պետք է վերաթոշակավորման նոր կարգ մտածել, թոշակները բարձրացնել: Կտրականապես պետք է մերժել այդ առաջարկը, որովհետև ի՞նչ մեղք ունի օրինակ ուսուցիչը կամ գիտնականը, ինչո՞ւ ոչ նրանց, այլ հենց դատավորի թոշակը պետք է բաձրացնել»,-նշեց նա: 

Վերջինիս խոսքով՝ առաջարկվող օրենքի նախագիծը խայտառակություն է, քանի որ նման կերպ շերտավորելով հասարակությանը՝ նվաստացնում են ցածր աշխատավարձ կամ թոշակ ստացողներին և գերարժևորում բարձր թոշակ տալով մյուս շերտերին՝ առավել ընդգծելով վերջիններիս արած գործի կարևորությունը:

«Գիտնականն ու գիտաշխատողը մեղավո՞ր են, կամ քի՞չ բան են արել, որ այդքան ցածր թոշակ է նրանց համար սահմանված: Բա դա ասելո՞ւ բան է, 600 հազար դրամի հետ կատակ են անում: Մարդիկ 50 տարի գիտական գործունեությամբ են զբաղվում, այդքան մեծ ստաժ են ունենում և արդյունքում ստանում են 50 հազար դրամ թոշակ: Այստեղ տեղին է հարց հնչեցնել՝ իսկ ո՞վ ասաց, որ դատավորը գիտնականից շատ է ծառայել, ավելի շատ նպաստել ժողովրդի զարգացմանը: Յուրաքանչյուր արտոնյալ խավ՝ ևս մեկ բշտիկ է հասարակության համար, ուստի՝ բոլորին հավասար է պետք նայել»:

Գրականագետն անընդունելի է համարում նաև իշխանության ներկայացուցիչների այն հիմնավորումները, թե դատավորների աշխատավարձերը բարձարցնելով, կամ նրանց համար բարձր թոշակներ սահմանելով, պայքար են մղում կոռուպցիայի դեմ. «Սո՛ւտ է, չկա՛ նման բան, ինչքան էլ թոշակն ու աշխատավարձը բարձրացնեն, կոռուպցիան չեն մեղմի, իրենց համար ցանկացած հարմար պահի այդ կոռուպցիան կգործի, այնպես որ՝ այդ հիմնավորումները բացաձակապես չեն համապատասխանում իրականությանը»,-խոսքը եզրափակեց մեր զրուցակիցը:

Աղավնի Սուքիասյան