«Փաստ»․ Երբ պաշտոնյաները նախընտրում են բիզնես կարգի թռիչք

«Փաստ» օրաթերթը գրում է.

2016 թ. Բնապահպանության տարեկան բյուջեն կազմել է 1 միլիարդ 423 միլիոն դրամ: Այս մասին «Փաստին» տեղեկացնում են նախարարությունից: Սակայն արտասահմանյան գործուղումների ծախսերը չեն ներառվում ՀՀ բնապահպանության նախարարության տարեկան բյուջեում: Յուրաքանչյուր գործուղման համար ծախսեր իրականացվում են վարչապետի որոշումներով «Արտասահմանյան գործուղումներ» բյուջետային ծրագրի միջոցների հաշվին:

«Փաստի» հարցմանն ի պատասխան Բնապահպանության նախարարությունից տեղեկացնում են, որ 2016 թ. ընթացքում այն միայն հինգ արտասահմանյան գործուղում է ունեցել, որոնց մասնակցել են նախարարության յոթ աշխատակից: Նշված հինգ գործուղումների ամբողջ ծախսը կազմել է 3 միլիոն 972 հազար դրամ, որից միայն ավիատոմսեր գնելուն ուղղվել է 1 միլիոն 527 հազար դրամ:

Գործուղման քաղաքներն են եղել Մոսկվան, Բաթումին, Թեհրանը, Լյուքսեմբուրգն ու Բրյուսելը: Ըստ նախարարության կողմից ներկայացված հարցման պատասխանի՝ ներկայի նախարար Արծվիկ Մինասյանը 2016 թ. ընթացքում մեկ գործուղում է ունեցել. նա նախորդ տարվա հոկտեմբերին գործուղվել է Լյուքսեմբուրգ Շրջակա միջավայրի և կլիմայի փոփոխությունների վերաբերյալ ԵՄ և Արևելյան Գործընկերության երկրների նախարարների հանդիպմանը մասնակցելու նպատակով: Նրա գործուղումը, որն ի դեպ ամենից թանկն է եղել տարվա ընթացքում, արժեցել է 911 հազար 581 դրամ, որից ավիատոմսը կազմել է 435 հազար դրամ, իսկ ավելի քան 476 հազար դրամը նախատեսվել է գիշերակացի և սննդի համար:

Այնքան էլ մատչելի չեն եղել նախկին նախարար Արամայիս Գրիգորյանի և բնապահպանության նախարարության աշխատակազմի իրավաբանական վարչության պետ Խաչատուր Խաչատրյանի 2016 թ. գործուղումները: Առաջինի դեպի Մոսկվա և երկրորդի դեպի Բրյուսել գործուղումներն արժեցել են համապատասխանաբար 787 հազար 140 և 793 հազար 276 դրամ: Նախկին նախարարը ապրիլին Մոսկվա էր մեկնել մասնակցելու «ԷԿՈՏԵԽ» միջազգային ցուցահանդես–համաժողովին: Արամայիս Գրիգորյանի դեպի Մոսկվա երկկողմանի ավիատոմսը արժեցել էր 250 հազար 675 դրամ: Մնացած 536 հազար դրամը ուղղվել է գիշերակացին և սննդի գնմանը:

Խաչատուր Խաչատրյանի դեպի Բրյուսել ավիատոմսը ձեռք է բերվել 413 հազար դրամով: Ի դեպ դիտելով, online.aviatomser.net կայքը, որտեղ կարելի է հաշված րոպեների ընթացքում ավիատոմսերի արժեքների միջին գները ճշտել, տեսնում ենք, որ փետրվար ամսին դեպի Բրյուսել հետադարձով գնված ավիատոմսը կարող է արժենալ միջինում 355–381 ԱՄՆ դոլար: Սա իհարկե էկոնոմ կարգի ավիատոմս գնելու դեպքում է: Սակայն ինչպես հայտնի է, պաշտոնյաները սիրում են օգտվել իրենց տրված «լիազորություններից» և ճամփորդել այնպես, ինչպես իրենք են կամենում: Ըստ այս նույն կայքի՝ արդեն բիզնես կարգի ավիատոմսերի արժեքը սկսվում է 983 ԱՄՆ դոլարից և հաշվի առնելով, որ ճշտված գները 2018 թ. համար են, կարելի է ենթադրել, որ Խաչատրյանի 850 ԱՄՆ դոլարով գնված ավիատոմսը բնավ էլ էկոնոմ կարգի չէ:

Նախարարության մեկ այլ գործուղում՝ Ջրային ռեսուրսների կառավարման գործակալության պետի տեղակալ Արտյոմ Մխիթարյանի դեկտեմբրի 3–6–ն ընկած ժամանակահատվածում դեպի Թեհրան կատարված այցը արժեցել է 479 հազար դրամ, որից ավիատոմսը կազմել է 177 հազար դրամ: Վերջինս մեկնել էր Իրան Երկու երկրների միջկառավարական համատեղ հանձնաժողովի 14–րդ նիստին մասնակցելու նպատակով:

Շարունակությունը` «Փաստ» օրաթերթի այսօրվա համարում