Ի՞նչ խաղ է խաղում Մարտիրոսյանը

Համացանցում է հայտնվել  իր ադրբեջանասիրությամբ հանրահռչակված  Վահան Մարտիրոսյանի 2-րդ տեսաուղերձը, ուր նա, դիմելով մարդու իրավուքների հարցերով զբաղվող արևմտյան կազմակերպություններին, նոր բացահայտումներ է կատարում՝ կապված Ադրբեջանի հակահայկական պլանների ու գործողությունների հետ:

Տեսաուղերձում, որն, ըստ Մարտիրոսյանի, ձայնագրվել է Հայաստանի ու Ադրբեջանի սահմաններից դուրս, Բաքվին խարազանող, նույնիսկ ինչ-որ տեղ արժեքավոր տեղեկություններ պարունակող ուղերձներ կան, որոնք բարձրաձայնելով՝ Մարտիրոսյանն, ըստ էության, փորձել է շարունակել իր առաջին տեսաուղերձով սկիզբ դրած ավանդույթն ու հանդես գալ հայրենասերի կերպարով:

Թե իրականում ինչ պլաններ է հետապնդում սույն «Ջեյմս Բոնդը»՝ խայտառակելով Ադրբեջանի ստոր նպատակներն ու պլանները, մանրամասնորեն պատմելով ադրբեջանական հատուկ ծառայությունների իրական նպատակների մասին՝ կապված «խաղաղության պլատֆորմի» հետ, իհարկե, խոսակցության միգուցե միանգամայն այլ թեմա է, բայց այն, որ իր այս քայլերով Մարտիրոսյանն ակամա որոշակի իմաստով դրական դեր է խաղում ազերիների լկտի դիմակը պատռելու հարցում, փաստ է: Ճիշտ է՝ դժվար թե որևէ լուրջ մեկի համար Ադրբեջանի ստոր պլաններն անակնկալ հանդիսանան այն էլ Մարտիրոսյանի կողմից բացահայտված, սակայն այն, որ դրա մասին բարձրաձայնվում է ազերիական լրտեսի կողմից, արդեն իսկ կարելի է դրական քայլ համարել:

Թե ինչ դուրս կգա այս ամենի արդյունքում, կամ ինչ ավարտ կունենա Մարտիրոսյանի սկսած խաղը, միգուցե կարող է միմիայն ժամանակը ցույց տալ, բայց որ այս ամենով չափից դուրս տարվել ուղղակի չի կարելի, անկասկած է. Մարտիրոսյանն անկանխատեսելի խաղի մեջ է մտել՝ խիստ կասկածելի ավարտով:

Դավիթ ԲԱԲԱՆՈՎ