Հայաստանի տնտեսությունը կկանգնի փաստի առաջ

Հայաստանի` օրըստօրե անկում ապրող տնտեսության ֆոնին ԱՎԾ-ն չի դադարում հմայիչ թվեր հրապարակել, որոնք իբր փաստում են, թե ինչ թռիչքաձև աճ ենք գրանցում մենք, ասենք, հատկապես արտահանման ուղղությամբ. 2017 թվականի հունվար-ապրիլ ամիսներին ՀՀ-ից արտահանումը իբր կազմել է ավելի քան 600 մլն դոլար, ինչն ավելի քան 16%-ով առավել է նախորդ տարվա նույն ժամանակահատվածի հետ համեմատած:

Ինչպես հայտնի է, ռուս-թուրքական հարաբերությունների ձնհալի ֆոնին, Մոսկվան, որպես բարի վերաբերմունքի նշան՝ արդեն վերացրել է գրեթե բոլոր ահմանափակումները, որոնք դրվել էին Թուրքիայի նկատմամբ, կապված հայտնի իրադարձությունների հետ: Իսկ սա նշանակում է, որ մեր տնտեսությունն իրապես հայտնվելու է խիստ ծանր վիճակում, քանի որ գյուղատնտեսական ապրանքնրի պահանջարկը Ռուսաստանում, գաղտնիք չէ, հիմնականում լրացվել ու հետայսու ևս լրացվելու է Թուրքիայի շնորհիվ. այս երկիրը ռուսական շուկա գյուղմթերք արտահանող թիվ մեկ երկրների շարքին է դասվում: ՌԴ-ում թուրքական գյուղմթերքը մեծ պահանջարկ է վայելում:

Հիմա հարց է ծագում`  որքանո՞վ տեղի ունեցածը կազդի Հայաստանի տնտեսության վրա այն դեպքում, երբ Հայաստանից ՌԴ արտահանվող ապրանքների առյուծի բաժինը հենց գյուղմթերքն է հանդիսանում: Միանշանակ է, որ այն խիստ բացասաբար է անդրադառնալու մեզ վրա.  չնայած՝ ասել, թե արգելքներն առանձնապես դրական էին անդրադարձել Հայաստանի արտահանման վրա, ևս չենք կարող. այն ժամանակ էլ միջին ասիական երկրներն էին իրենց բերքուբարիքով լիացրել ռուս սպառողների օջախները` կանգնեցնելով Հայաստանին փաստի առաջ: Ի դեպ` կրկնաարտահանման առումով ևս այլևս չենք կարողանալու իրավիճակ փրկել, քանի որ դրա իմաստն ուղղակի վերանալու է. ռուս-թուրքական տնտեսական հարաբերությունների սերտացման ֆոնին, երբ Թուրքիան հնարավորություն է ստանում անմիջականորեն սեփական մթերքն իրացնելու ՌԴ շուկայում, միջնորդ երկրների կարիքն ուղղակի հօդս է ցնդում` չհաշված, թերևս, թուրքական լոլիկները, որոնց նկատմամբ սահմանափակումները դեռևս պահպանվելու են:

Եվ այսպես` որտեղի՞ց ԱՎԾ-ին նման հյութեղ թվեր այն պարագայում, երբ զուտ օբյեկտիվորեն՝ նման թիվ ստանալն ուղղակի ահնհնար է` նույնիսկ, եթե թուրքական պետության բերրի դաշտավայրերի ողջ լոլիկը Հայաստանի միջոցով արտահանված լիներ ՌԴ. կեղծիքն ուղղակի ակնհայտ է:

Դավիթ ԲԱԲԱՆՈՎ