«Ռեալ»-ը` 12-րդ անգամ Չեմպիոնների լիգայի գավաթակիր (տեսանյութ, լուսանկարներ)

Քարդիֆի «Միլենիում» մարզադաշտում, որը տեղավորում է 74500 հանդիսական, տեղի ունեցավ եվորապական ամենահեղինակվոր մրցաշարի` Չեմպիոնների լիգայի եզրափակիչ դիմակայությունը:

Գավաթի համար պայքարեցին մրցաշարի ամենատիտղոսակիր ակումբը` Մադրիդի «Ռեալ»-ը և Թուրինի «Յուվենտուս»-ը: Հաղթողը մադրիդյան թիմն էր, որը առավելության հասավ 4:1 հաշվով:

Մեկնարկից 20-րոպե անց Բուֆոնի պաշտպանած դարպասը գրավեց Կրիշտիանու Ռոանալդուն: Պորտուգալացին դարձավ մադրիդյան թիմի 500-րդ գոլի հեղինակը (այս մրցաշարում): Մադրիդյան թիմը պատմության մեջ առաջինն է, ում հաջողվեց այս մրցաշարում  հատել 500 գոլի սահմանագիծը:

Պատասխան գոլին երկրպագուները շատ չսպասեցին. 7 րոպե անց Մարիո Մանջուկիչը հավասարեցրեց հաշիվը:

Առաջին խաղակեսն ավարտվեց 1:1 հաշվով: Երկրորդ խաղակեսում Զիդանի թիմի ֆուտբոլիստները ևս երեք անգամ գրավեցին թուրինցիների դարպասը:

61-րդ րոպեին Կարլոս Կազեմիրոն հաշվի մեջ առաջ մղեց իր թիմին, իսկ երեք րոպե անց Ռոնալդուն խփեց իր երկրորդ գոլը այս խաղում: Պորտուգալիայի հավաքականի առաջատարի համար այս գոլը դարձավ իր կարիերայի 600-րդ գոլը, որոնցից 406 հեղինակել է «Արքայական ակումբում»:

Ռոնալդուն նաև ռեկորդ սահմանեց` դառնալով պատմության միակ ֆուտբոլիստը, ով Չեմպիոնների լիգայի երեք եզրափակիչ անընդմեջ գոլի հեղինակ դարձավ:

Հանդիպման 84-րդ րոպեից թուրինյան թիմը մնաց տասը հոգով. երկրորդ դեղինը ստացավ և դաշտից հեռացվեց Կուադրադոն: Իսկ խաղավարտին գոլ խփելու հնարավորությունը բաց չթողեց Ասենսիոն:

Արդյուքում «Ռեալ»-ը պատմության մեջ 12-րդ անգամ նվաճեց Չեմպիոնների լիգայի գավաթը:

«Արքայական ակումբը» դարձավ պատմության առաջին թիմը, ով կարողացավ պաշտպանել այս տիտղոսը` նվաճելով գավաթը երկրորդ տարին անընդմեջ: