Հնդկաստանում ամուսինները անտառ են ստեղծել (տեսանյութ)

Հնդկաստանում ամուսինները 26 տարի են ծախսել՝ անուշադրության մատնված հողատարածքն արևադարձային անտառի վերածելու համար, որտեղ կենդանիների հազվագյուտ եւ անհետացող տեսակներ են ապրում:

Պամելա Գեյլ Մալհորտն ու նրա ամուսինը՝ Անիլ Մալհորտը, Sai արգելոցն են ստեղծել՝ միակ վայրի բնության մասնավոր արգելոցը Հնդկաստանում: Սկսել են աշխատել 1991 թվականից, և հիմա անտառն ավելի քան 121 հեկտար տարածք է զբաղեցնում: Այն տուն է դարձել ֆլորայի և ֆաունայի շուրջ 200 անհետացող տեսակների ներկայացուցիչների համար, որոնց թվում են բենգալյան վագրն ու ասիական փիղը: Այս մասին գրում է Bored Panda-ն:

Great Big Story-ին տված հարցազրույցում Պամելան պատմել է՝ երբ առաջին անգամ գնացել են այնտեղ, հողերի մեծ մասը, որն իրենց են վաճառել, անտերության էր մատնված․ «Լքված բրնձի դաշտեր, սուրճի տնկադաշտեր: Շատ ուշադրություն եւ ժամանակ, էներգիա էր անհրաժեշտ ու բազմաթիվ տարիներ՝ անտառը վերականգնելու համար»։

Այժմ ամուսինների շնորհիվ այստեղ անտառ է հայտնվել, որտեղ կենդանիները կարող են ապաստան գտնել:

«Հիշում եմ, թե ինչպես էինք քայլում այս վայրերով եւ ոչինչ չէինք լսում՝ մեր սեփական քայլերից բացի»,- ասել է Պամելան՝ նշելով, որ այժմ անտառն ապրում է և լցվել է տարատեսակ ձայներով: