ԱՊՊԱ-ն խաբում է ժողովրդին

Տարիներ առաջ, երբ Հայաստանում ակտիվորեն ներդրվում էր ապահովագրության ինստիտուտը՝ դրա տարբեր ճյուղերով հանդերձ, ներդրման ջատագովները օր ու գիշեր ազգաբնակչությանը քարոզում էին, համոզում, թե դա արվում է բացառապես Հայստանը եվրոպական չափանիշներին մոտեցնելու, հայ մարդու կենցաղն ու կյանքը բարելավելու, մի խոսքով՝ Հայստանը Շվեյցարիա դարձնելու նպատակով: Ու որքան էլ շատերը թերահավատությամբ էին մոտենում այդ նախաձեռնությանը, գտնվեցին նաև այնպիսիք, ովքեր փորձեցին հավատալ այսպես ասած քարոզիչներին, ու  նետվեցին ապահովագրական ընկերությունների գիրկը:

Անցան, սակայն, տարիներ, ու բոլորին պարզ դարձավ, որ բոլոր այն հավաստիացումները, թե իբր Հայաստանում բիզնեսի նոր տեսակի հիմնումը պայմանավորված է բացառապես ժողովրդի կյանքը հեշտացնելու՝ համապատասխանների ձգտմամբ, սին էին ու սովորական մարքեթինգային հնարք. թվերով ապացուցված է, որ ապահովագրական բիզնեսը դրանց տերերի համար այսօր Հայաստանում հսկայական գերշահույթներ բերող գործի է վերածվել:

Այսպես՝ ԱՎԾ-ն ներկայացրել է համապատասխան վիճակագրություն, որից պարզ է դառնում, որ, դիցուք՝ 2017 թվականի առաջին եռամսյակում ապահովագրավճարների ծավալը կազմել է ավելի քան 9,5 մլրդ դրամ այն դեպքում, երբ հատուցումն ընդամենը 4 մլրդ դրամից քիչ ավելի է կազմել, որի առյուծի բաժինը հանդիսացել է ցամաքային ավտոտրանսպորտային միջոցների մասով տրվող փոխհատուցումը՝ մոտ 3 մլրդ դրամ:

Իսկ այս ամենը մի շատ տրամաբանական հարց է առաջ բերում՝ որքանո՞վ է ապահովագրության համար սահմանված վճարների չափը արդարացի ու համապատասխան մեր բնակչության սոցիալական մակարդակին. արդյոք այդ վճարները վաղուց գերավճարների չե՞ն վերածվել: Չէ՞ որ փաստացի գումարների կեսից ավելին հոսել է համապատասխան բիզնեսմենների գրպանները…

Ցավոք, բնակչության հաշվին գերշահույթներ ստանալը Հայաստանում վաղուց սովորական երևույթ է դարձել, նույնիսկ՝ ազգային ավանդույթի պես մի բան. այստեղ հիմնում են միայն այնպիսի բիզնեսներ, որոնք թույլ են տալիս բնակչությանը լիարժեքորեն կեղեքելու, ի հաշիվ բնակչության փող դիզելու. ինչ արած՝ սովորական պրակտիկա է:

Դավիթ ԲԱԲԱՆՈՎ