«Փաստ». Երեք տարի է Ռազմական ինստիտուտի կուրսանտի սպանության գործն անհիմն ձգձգվում է

«Փաստ» օրաթերթը գրում է.

ՀՀ ՊՆ Վազգեն Սարգսյանի անվան ռազմական ինստիտուտի կուրսանտ Հայկազ Բարսեղյանի սպանության մեջ մեղադրվող նրա համակուրսեցիներ՝ Գնել Թևոսյանի, Նորիկ Սահակյանի, Վաչե Սահակյանի և Մովսես Ազարյանի դատավարությունը շարունակվում է արդեն երեք տարի: Եվ ամեն անգամ այս կամ այն պատճառով նիստը հետաձգելը դարձել է աշխատաոճ դատավորի համար: Թե իրականում ինչ պատճառով է ամեն անգամ այն հետաձգում, պարզ չէ, բայց որ դեռ սայլը տեղից չի շարժվում՝ միանշանակ է:

Հունիսի 5–ին նշանակված հերթական դատական նիստը կրկին հետաձգվեց, դրանից առաջ էլ երկար ժամանակով ընդմիջվել էր, քանի որ համապետական և Երևանի ավագանու ընտրություններն էին:
Հայկազի տատիկը «Փաստի» հետ զրույցում ասաց, որ հաջորդ նիստը նշանակված է հունիսի 12–ին, բայց իրենց ոչ առողջությունը և ոչ էլ նյարդերը այս ամենին այլևս չեն դիմանում:

«Հոգնել ենք այս ամենից: Այս անգամ էլ հանցագործներից ինչ–որ մեկի եղբայրն էր մահացել, զանգահարեցին տղայիս ու ասացին, որ դատ չի լինելու: Այ այսպես ամեն շաբաթ մի պատճառ կա: Արդեն երեք տարի է այս վիճակն է: Շատ հեշտ սպանեցին ու տարան կախեցին թոռնիկիս, հիմա էլ դատն են անընդհատ ձգձգում: Մենք նիստը վարող դատավորից ու դատախազից ոչ մի բողոք չունենք: Ամեն ինչը տեղը–տեղին անում են, բայց մի օր մեկի փաստաբանը չի գալիս, մյուս օրը՝ մյուսի ու այդպես արդեն երեք տարի»,– ասաց Հայկազի տատիկը:

Հիշեցնենք, որ ըստ մեղադրանքի՝ նրանք 2015 թ. հունվարի 29–ին՝ ժամը 2:00–3:00–ի սահմանում, զորամասի ննջարանում դաժանությամբ սպանել են կուրսանտ Հայկազ Բարսեղյանին, ապա հետքերը թաքցնելու նպատակով կախել նրա մարմինը մարզահրապարակում գտնվող պտտաձողից, նրա անունից գրություն թողել, թե իբր ինքնասպան է եղել: Ամբաստանյալներն իրենց մեղավոր չեն ճանաչում:

Շարունակությունը` «Փաստ» օրաթերթի այսօրվա համարում