Մենք այս դարդին ո՞նց դիմանանք...

Նախկին պատգամավոր Առաքել Մովսիսյանը, պատասխանելով Yerkir.am-ի այն հարցին, թե նորընտիր պատգամավորներից որևէ մեկին անձամբ ճանաչո՞ւմ է, ասել է. «Բայց իրանք ո՞վ են, որ ես ճանաչեմ, իրանք պտի բոլորն ինձ ճանաչեն, ես շա՞տ իմանամ՝ ովքեր են: Հները մերոնք են, իսկ մնացածը` իրանք պտի ճանաչեն»:

Հա էլի: Այդ ո՞վ դառան ԱԺ ներկայիս պատգամավորները, որ Շմայսը նրանց ճանաչի: Այո, այդ պատգամավորները պետք է անգիր ճանաչեն մեր օրենսդիր մարմնի երբեմնի լավագույն ներկայացուցիչներից մեկին, ծանոթանան նրա լեզվամտածողությանը, բառապաշարին: Բացի այդ, նախորդ գումարման Ազգային ժողովի մտքի կաճառը պարզապես համոզված է, որ իր իր մասնակցությունն անժխտելի անհրաժեշտություն է երկրի կյանքում: Իրականում՝ նա ճիշտ է, Շմայսը ցանկացած քաղաքական ուժի համար նախանձելի, ցանկալի և օրինակելի պատգամավորի տիպար է մեր ժամանակներում: Իսկ դրա մասին վկայում է ոչ միայն վերջինիս փողոցային պահվածքը Ազգային ժողովում` իբրև ամենաազդու արգումենտ, այլև թվային ցուցանիշները՝ նրա դրսևորումների մասին:

Այսպես, ըստ «Պառլամենտ մոնիտորինգ»-ի տվյալների՝ Առաքել Մովսիսյանի՝ «կողմ» քվեարկելու տոկոսային արտահայտությունը կազմում է 83.11 %: Չշտապեք մտածել, թե մնացած դեպքերում նա դեմ կամ ձեռնպահ է եղել: Ոչ և կրկին ոչ: Պարզապես Շմայսը մնացած 12.84 % դեպքերի համար բացակայել է խորհրդարանից, իսկ 4.05 %-ի դեպքում՝ պարզապես չի քվեարկել: Հավանաբար, հավես չի արել կոճակը սեղմել: Ինչ խոսք, հանրությունը րոպե անգամ չի կասկածում, որ Առաքել Մովսիսյանի վերադարձը մեծ քաղաքականություն՝ մեծագույն նպաստը կլինի մեր երկրի զարգացման և բարեկեցության համար: Ընդ որում, ինքը Մովսիսյանը՝ չի բացառում սույն երջանիկ իրադարձության հավանականությունը, նշելով՝ «Ես ցանկացած ժամի, ցանկացած վայրկյան, ցանկացած տեղում կարող եմ հայտնվել, սպասեք մնացած զարգացումներին»: Դե ինչ, սրտի տրոփյունով սպասենք, թե երբ մեր քաղականություն կվերադառնա բովանդակությունը, ինտելեկտը և պատասխանատվությունը: Թե չէ՝ արդեն կարոտեցինք…

Ստելլա Խաչատրյան