Արամ Խաչատրյան համերգասրահի ճեմասրահը կզարդարի մեծանուն հայ կոմպոզիտորի կիսանդրին

Արամ Խաչատրյան համերգասրահում կայացավ մեծանուն հայ կոմպոզիտոր Արամ Խաչատրյանի կիսանդրու բացման հանդիսավոր արարողությունը: Կիսանդրու հեղինակ, Հայաստանի վաստակավոր նկարիչ Միքայել Սողոյանը նշեց, որ իր համար մեծ պատիվ է գտնվել Հայաստանում: Նրա խոսքով` այս օրվա մեջ հատուկ էներգետիկա կա:

«Համաշխարհային հռչակ ունեցող մեր սիրելի կոմպոզիտորը` Արամ Խաչատրյանը մեկ անգամ էլ կարմիր գծով անցնում է Հայաստանով: Այս տարվա փետրվարին Մոսկվայի կոնսերվատորիայի դահլիճում մենք նույնպես տեղադրեցինք կոմպոզիտորի կիսանդրին: Այսօր մենք այն տեղադրում ենք հայրենիքում, միգուցե հարկավոր էր սկզբում այստեղ տեղադրել, հետո նոր Մոսկվայում, սակայն Արամ Խաչատրյանն իր կյանքի մեծ մասն անցկացրել է ՌԴ-ում, այդ պատճառով Մոսկվան նույնպես նրա տունն է: Ես շատ հպարտ և գոհ եմ, որ կատարում ենք այս քայլը»,- ասաց քանդակի հեղինակը:

ՀՀ մշակույթի նախարար Արմեն Ամիրյանի խոսքով` շատ ուրախալի երևույթ է համադրել կիսանդրու բացումը կոմպոզիտորի ծննդյան օրվա հետ:

«Ուզում եմ շնորհակալություն հայտնել քանդակի հեղինակին և համերգասրահի ղեկավարին, որ շատ ճաշակով կարողացան տեղադրել կիսանդրին: Այսուհետ համերգասրահում ներկա է լինելու խաչատրյանական գույնը և միջավայրը»,- ասաց նախարարը:

Բացման արարողությունը տեղի ունեցավ կոմպոզիտորի ծննդյան օրը: