«Փաստ». Յուրի Ավետիսյանը Լեզվի պետական տեսչությունը լուծարելու 4 պատճառ է բերում

«Փաստ» օրաթերթը գրում է.

Ինչպես հայտնի է, Կառավարությունը որոշել է լուծարել Լեզվի պետական տեսչությունը: Այս մասին արդեն իսկ կա նախագիծ, որը ենթադրաբար պետք է քննարկման դրվեր մայիսի 25–ին կայանալիք կառավարության նիստի օրակարգում: «Փաստի» հետ զրույցում Երևանի պետական համալսարանի Հայոց լեզվի ամբիոնի վարիչ Յուրի Ավետիսյանը նշում է, որ հարցը պետք է քննարկվեր մայիսի 25–ի կառավարության նիստում, բայց այն չի քննարկվել և ըստ վերջինի՝ նախարարությունը գուցե՞ հակված է չլուծարելու տեսչությունը, և դեռ ավելին՝ կարգավիճակը բարձրացնելո՞ւ: «Պիտի սպասենք, թե քաղաքականությունը ինչ ուղղությամբ կգնա»,– ասում է նա:
Սակայն մինչ այս մեր այն հարցին, թե տեսչության լուծարումը ի՞նչ հետևանքներ կարող է ունենալ և արդյո՞ք որն է լուծարման իրական պատճառը՝ վերջինս պատասխանում է, թե որքանով ինքն է հասկացել՝ ցանկանում են լուծարել և տրոհել գործառույթները տարբեր նախարարությունների և կազմակերպությունների միջև: «Այդ իմաստով, իհարկե, եթե հսկողությունը կենտրոնացված չէ՝ թուլանալու է: Իսկ լեզվի պետական տեսչությունը կարողանում էր վերահսկողությունը կենտրոնացված պահել իր ուշադրության կենտրոնում:
Այսինքն՝ կանոնակարգով այդպես է, բայց ուրիշ հարց է, որ Լեզվի պետական տեսչությունը չէր իրականացնում, ի զորու չէր կամ չէր կարողանում իրականացնել այդ աշխատանքները:
Իրենց ասելով դաշտը կանոնակարգված չէր, իրենք բավարար լծակներ չունեին գործառույթներն իրականացնելու համար: Հետևաբար իրենք այս վերջին 12 տարիների ընթացքում գրեթե չեն աշխատել, չնայած ասում են, որ 2012–14 թթ. 70–100 վարույթներ են իրականացրել: Սակայն մյուս կողմից էլ կառավարության ներկայացուցիչը ասում է, որ նրանք իրավունք չունեին նման գործառույթ իրականացնելու»,– նշում է նա:
Յուրի Ավետիսյանը մեզ հետ զրույցում տեսչության լուծարման չորս պատճառներ է բերում. «Պատճառներից մեկը հավանաբար այն է, որ կառավարությունը ցանկանում է ապակենտրոնացնել վերահսկողությունը, որը երևի իրենց քաղաքականության մասն է: Երկրորդն այն է, որ իրականում տեսչությունը վերջին տասնամյակում և դեռ մի փոքր էլ ավելի՝ անգործության էր մատնված: Երրորդը պատճառն իմ կարծիքով ապաշնորհ ղեկավար ունենալն է, ով չի կարողանում իրականացնել գործառույթներ, գրեթե լավ չի պատկերացնում անելիքները: Չորրորդ պատճառն էլ այն է, որ այդ գործունեության, իրավասությունների մի հատվածը վերապահվեց Հայերենի բարձրագույն խորհրդին, որը ստեղծելու որոշումը կայացրել է կառավարության ղեկավարը և առաջիկայում այդ խորհուրդը պիտի գործի:
Սրանից բացի, ասում են, որ ահագին գումարներ են վճարվել ու աշխատանքներ չեն իրականացվել: Բայց հարց է առաջանում՝ ինչո՞ւ աղմուկ բարձրացվեց Լեզվի պետական տեսչության ղեկավարի հետ կապված հենց հիմա, երբ լուծարման հարց է դրված: Կարող էին 13 տարի առաջ բարձրացնել հարցը, երբ իր ձեռքերը շղթայում էին և ինքը ոչինչ չէր անում, բայց դրա դիմաց գումարներ էր ստանում: Կառավարությունն էլ մյուս տեսանկյունից է ճիշտ. գումար են տվել, ձայն հանեիք, դաշտը կարգավորեիք և աշխատեիք, բա ինչո՞ւ եք լռել այսքան տարի»,– ասաց մեր զրուցակիցը:

Շարունակությունը` «Փաստ» օրաթերթի այսօրվա համարում