Չենք կարող կողմ քվեարկել, լավագույն դեպքում՝ ձեռնպահ կքվեարկենք. Բոստանջյան

«Ծառուկյան» խմբակցության պատգամավոր Վարդան Բոստանջյանը, խոսելով համայնքների խոշորացման ծրագրի մասին՝ անդրադարձավ Արարատ Զուրաբյանի ելույթին և նշեց, որ վերջինս իզուր հիշեց 1996 թ.-ի վարչատարածքային կառավարումը, ըստ որի՝ մենք անցանք այնպիսի տեղական ինքնակառավարման համակարգի, որը, նրա կարծիքով, չստացվեց. «Տեղական ինքնակառավարում եվրոպական խարտիան իմպերատիվ դրույթ ունի այն մասին, որ ցանկացած տեղամասում տեղական ինքնակառավարում կազմակերպելու համար պարտադիր պետք են առնվազն ֆինանսական և աշխատանքային համապատասխան ռեսուրսներ»,- նշեց նա:

Նրա խոսքով՝ եթե տարիներ առաջ չեն արել համայնքների խոշորացումը, և դրանով պայմանավորված՝ մտցրել են միջհամայնքային միավորումների ստեղծման մասին օրենք, այնուամենայնիվ, այդ ինստիտուտը մինչ օրս չի կայացել:

Բոստանջյանի կարծիքով՝ պետք է մտածել համայնքների խոշորացման մասին, բայց խոշորացումը այդպես չի կատարվում, ինչպես այս ծրագրով է ներկայացված. «Այս ծրագիրն ունի սահմանադրական բազմաթիվ հոդվածների խախտում, տեղական հանրաքվեի մասին օրենքների պահանջների չկատարում և այլն: Փոքր երկրի կտրվածքով, եթե հազար կտորների բաժանենք, ռեսուրսների փոշիացում կունենանք և նրանց ոչ ռացիոնալ օգտագործում: Հիմա կարող են էստեղ բազմաթիվ համայնքների ղեկավարների թղթեր բերել ու կնիքներն էլ վրան դրած, պարզ չի՞ որ գրեթե 400 համայնքի ղեկավարներ զրկվում են սուղ ֆինանսական միջոցներով թանկարժեք մեքենաներ առնելուց, իրենց նպատակների համար օգտագործելուց: Բնականաբար, դժվարություններ, խոչընդոտներ պետք է լինեն այսպիսի օրենքի համար, բայց, այդուհանդերձ, օրենքի ներկայացումը պահանջում էր, որ կառավարությունը մոտենար այս հարցին այնպես, որ մենք իսկապես կարողանայինք ունենալ տեղական ինքնակառավարման մարմինների ֆինանսական հնարավորությունների ընդլայնում»:

Պատգամավորը նշեց, որ մի շարք հարցերի պատասխաններ նշված չեն ծրագրում. «Մի քանի համայնքների միավորումը մեկ համայնքում տեղավորելը ինչպիսի՞ ծրագրերի իրականացում է ենթադրում, ինչպե՞ս պետք է իրականացնել դրանք, ի՞նչ պետական աջակցություն պետք է կատարվի»,- ասաց նա՝ ավելացնելով, որ դրանց վերաբերյալ՝ ծրագրում խոսք չկա:

«Այս դեպքում մենք չենք կարող կողմ քվեարկել, լավագույն դեպքում՝ ձեռնպահ կքվեարկենք, բայց կողմ չենք քվեարկի»,- խոսքը եզրափակեց նա: