Ալեքսանյանը «սննկացել» է

Ինչ ուզում եք՝ ասեք, բայց Սամվել Ալեսքանյանի դստեր հարսանիքը չափից դուրս աղմկահարույց ստացվեց. է՛լ Ջասթին Թիմբերլեյք, է՛լ հարսանիքի շոր, է՛լ ինչ ասես: Մի խոսքով՝ իսկական էլիտար հարսանիք: Հայտարարությունները, սակայն, որոնք հաջորդեցին հարսանեկան այդ խնջույքին, ու որոնք այս կամ այն կերպ կապված էին այդ իրադարձության հետ, ոչ պակաս աղմկահարույց դուրս եկան:

Այսպես՝ հունիսի 12-ին Երևանի քաղաքապետ Տարոն Մարգարյանի երդմնակալության արարողությանն իր մասնակցությունն էր բերել նաև պատգամավոր Սամվել Ալեքսանյանը: Բայց երևի թե առիթ չլիներ անդրադառնալու Ալեքսանյանի մասնակցությանն այդ արարողությանը, եթե չլիներ մի կարևորագուն հանգամանք. պատգամավորը, պարզվում է, «սննկացել» է: Լրագրողի հարցին՝ Ալեքսանյանն իրեն միլիոնատեր համարո՞ւմ է, թե՝ ոչ, հայտնի միլիարդատերն ուղղակի շշմեցնող պատասխան է տվել՝ հայտարարելով. «Ես ի՞նչ միլիոնատեր, ինձ որտեղի՞ց էդքան փող»:

Այն,որ Հայաստանի սոցիալ-տնտեսական վիճակը  հույսի տեղ անգամ չի թողնում, ու տնտեսական ճգնաժամն արդեն խեղդում է բոլորին, փաստ է: Ոչ պակաս ակնհայտ փաստ է նաև այն, որ ոչ մի տնտեսական ճգնաժամ ի վիճակի չէ ու չի կարող լինել՝ ազդելու հայրնի օլիգարխների բարեկեցության վրա, ու որքան աղքատանում է հասարակությունն, այնքան է՛լ ավելի են «թռփոշանում» հանրահայտ օլիգարխները. սա փաստ է, որը ոչ ոք այսօր չի կարող հերքել: Հիմա հարց է առաջ գալիս՝ այդ ե՞րբ  կամ հատկապես ի՞նչ պայմաններում է հայտնի միլիարդատերը  բոլորից թաքուն հասցրել «բանկրոտի» ենթարկվել, կամ ո՞րն է Ալեքսանյանի ունեցվածքի «կորստի» բուն պատճառը: Միգուցե մի մութ գիշերով  գողե՞րն են մարդու առանձնատունը կտրել ու ինչ կա-չկա՝ թալանել-տարե՞լ են: Իսկ եթե նա նմանատիպ հայտարարություններով ուղղակի փորձում է կոծկել իր անհատակ ունեցվածքն ու աչքի չընկնե՞լ…

Ո՞վ գիտի,  կամ ո՞վ կարող է կարդալ Ալեքսանյանի մտքերը. մարդը երևի թե մի բան գիտի, որ ասում է:

Դավիթ ԲԱԲԱՆՈՎ