«Փաստ»․ Ֆիրդուսի շուկայի առևտրականների մի մասն այլևս առևտրով չի զբաղվի

«Փաստ» օրաթերթը գրում է.

Այս կարծիքին է շուկայում արդեն 8 տարի հագուստի առևտրով զբաղվող Աղավնի Մելքումյանը, ով համոզված է, որ Ֆիրդուսի առևտրականների մի փոքր մասը միայն առևտուր անելու համար կգնա այլ շուկաներում կկանգնի: Իսկ ինքը առաջիններից մեկը կինի, ով կթողնի բիզնեսը:

Ինչպես հայտնի է Ֆիրդուսի շուկայի տարածքում նախատեսվում է նոր թաղամաս կառուցել: Մասնավորապես Հանրապետության հրապարակի հարևանությամբ գտնվող 5 հեկտարից ավելի տարածքում` Ֆիրդուսի շուկայի տարածքի կամ 33–րդ թաղամասի տեղում, նախատեսվում է կառուցել 85 մ տրամագծով կլոր հրապարակ, որն իր մեջ ներառելու է նոր փողոցներ, հասարակական և սպասարկման օբյեկտներ, բիզնես կենտրոններ, հյուրանոցներ և այլն:
Սակայն բիզնես թաղամասի կառուցումը բնավ էլ «ֆիրդուսցի» առևտրականների սրտով չէ: «Փաստի» հետ զրույցում Աղավնի Մելքումյանը շեշտում է, որ Ֆիրդուսի շուկան մի շարք առավելություններ ունի:

«Նախ փողոց է համարվում, ոտի տակի շուկա է: Այստեղ հաճախորդներ ավելի շատ են գալիս: Մարդիկ կարող է այդ պահին ինչ–որ բան գնելու կարիք չունենան, բայց տեսնեն ու առնեն»,– ասաց նա: Հարցին, թե մտավախություն ունե՞ն, որ այլ տեղ գնալու պարագայում եկամուտը կնվազի՝ վերջինս պատասխանում է, որ այո, կա նման բան. «Ես ուրիշ շուկա էլ եմ գնացել, բայց նորից այստեղ եմ վերադարձել»:

Այստեղ քաղաքապետարանը առևտրականներին առաջարկում է երկու տարբերակ՝ կամ «Երևան» տոնավաճառ կամ էլ՝ «Առինջ մոլ»: Բայց մեր զրուցակիցն ասում է, թե իրենց առաջարկելը շատ քիչ է, և իր ընտանիքը հավանաբար բիզնեսը կթողնի, որովհետև ըստ նրա՝ առևտուրը լրիվ վերացական հասկացություն է՝ հաշվի առնելով ամեն քայլափոխի հանդիպող հագուստի խանութները: Վերջինս համոզված է, որ շուկան նորմալ չի աշխատի: Առևտրով զբաղվելը թողնելու մի պատճառն էլ գնորդների թվի նվազումն է: Ըստ նրա այս տարվանից նվազումը խիստ նկատելի է:

«Հայաստանում մարդ էլ չի մնացել: Ամեն մի հաճախորդի ձեռքում դու կարող ես մի հատ ճամպրուկ տեսնել: Հարցնես՝ ուր ես գնում, կպատասխանեն՝ այստեղ անհնար է ապրել: Հասկանում եք, դրա համար կիսվել է՝ մի հոգի մի բան, մի երկուսը մեկ այլ բան է գնում, դրանով պիտի յոլա գնանք, վարձ տանք, հարկային մուծենք, տունը պահենք»,– նշում է նա:

Աղավնի Մելքոնյանը պատմում է, որ նախորդ շաբաթ գնացել են Երևանի քաղաքապետարան և իրենց՝ նախորդ անգամվա 5 օրվա փոխարեն 2 ամիս ժամանակ են տվել տաղավարներն ազատելու համար: Վերջինս նաև դեռ հույս ունի, որ երկրի ղեկավարությունը կարող է մի բան մտածել և իրենց մի ուրիշ, ավելի հարմարավետ աշխատանք առաջարկել, իհարկե արդեն ոչ առևտրի ոլորտում:

Ինչ վերաբերում է նրան, թե մինչև սեպտեմբեր ամիս նրանք կկարողանան իրենց ամբողջ ապրանքը վաճառել՝ զրուցակիցս նշում է, թե վաճառելը կվաճառեն, բայց մասամբ, մի մասն էլ արդեն էժան, ինքարժեքով: Այսինքն՝ վնասն օգուտից շատ կլինի:

«Մի քիչ գոնե պիտի ժողովրդի մասին էլ մտածեն: Էսքա՜ն խեղճացնելը, էսքա՜ն նսեմացնելը, չգիտեմ, հոգեկան ապրումներ ենք տանում, էն էլ ինչ ձևի»,– հավելեց նա:

Շարունակությունը` «Փաստ» օրաթերթի այսօրվա համարում