Ալավերդիում կատարված սպանությունը բացահայտվեց (տեսանյութ)

Հունիսի 13-ին, ժամը 12:10-ին, ոստիկանության Թումանյանի բաժնի ծառայողներն Ալավերդի քաղաքի Թումանյան 20 հասցեում գտնվող սուպերմարկետի մոտ կրակոցի ձայներ լսելով՝ մոտեցել և հայտնաբերել են 39-ամյա Կամո Փիրուզյանի դիակը՝ գետնին ընկած:

Ոստիկաններն անմիջապես դեպքի վայրում հայտնաբերել, վնասազերծել և սպանությունը կատարելու կասկածանքով բերման են ենթարկել 26-ամյա Վլադիմիր Դավթյանին: Նա հայտարարել է, որ ժամը 12-ի սահմաններում սուպերմարկետի մոտ իր կողմից ապօրինի պահված «Մակարով» ատրճանակով մի քանի անգամ թիկունքի կողմից կրակել է Կամո Փիրուզյանի վրա և սպանել նրան։ Խուզարկությամբ Դավթյանի բաճկոնի գրպանից հայտնաբերվել է 9 մմ տրամաչափի 5 փամփուշտ, իսկ ձեռքի պայուսակից՝ ծալովի դանակ։

Փաստի առթիվ ՀՀ քրեական օրենսգրքի 104 և 235 հոդվածների 1-ին մասերի հատկանիշներով հարուցվել է քրեական գործ:

Նշանակվել են համալիր փորձաքննություններ։

Վլադիմիր Դավթյանը ձերբակալված է։

Հանցագործության գործիք ատրճանակը, որի վրայից ջնջված է գործարանային համարը և թողարկման տարեթիվը, 5 փամփուշտները և ծալովի դանակը առգրավվել է։

Կատարվում է նախաքննություն։