«Փաստ». Պաշտոնական այցերը կաթվածահար են անում երթևեկությունը և կաթվածի հասցնում ժողովրդին

«Փաստ» օրաթերթը գրում է.

Ամեն անգամ, երբ որևէ բարձրաստիճան պաշտոնյա է Հայաստան այցելում կամ Հայաստանում միջին կալիբրից բարձր որևէ միջոցառում է կազմակերպվում, մայրաքաղաքի կյանքն ու երթևեկությունը կաթվածահար է լինում: Ու դա ոչ թե այն պատճառով, որ պատվիրակության անդամներն են շատ լինում, այլ հյուրերի ազատ տեղաշարժը կազմակերպելու համար փակվում են բազմաթիվ փողոցներ ու փաստացի կաթվածահար անում ողջ երթևեկը:
Այս երևույթի կողքով անշուշտ հնարավոր կլիներ անտարբեր անցնել, եթե այն ուղղակիորեն յուրաքանչյուր քաղաքացու նյարդային հանգույցին չհարվածեր: Բայց կարծես դիտավորյալ ամեն ինչ այն ոճով է կազմակերպվում, որ մարդիկ ուղղակիորեն ընկնեն նյարդային շրջապտույտի մեջ ու ստիպված լինեն հայհոյանքների հերթական տարափը տեղալ իշխանությունների հասցեին:

Երեկ առավոտյան ճանապարհային ոստիկանի մեքենան առանց որևէ մեկնաբանության փակեց մայրաքաղաքի Ազատության պողոտան և մի քանի վայրկյանում Բաբայան փողոցի ու Ազատության պողոտայի խաչմերուկում քաոսային իրավիճակ սկսվեց: Ճանապարհը փակած ոստիկանը հանգիստ հետևում էր մժեղների պես խմբված մեքենաների կույտին, սակայն որևէ ձևով չէր ուղղորդում վարորդներին, թե ինչ ուղղությամբ գնան, որ կարողանան այդ թնջուկից դուրս գալ:
Շատերը փորձեցին ճանապարհը շարունակել Բաբայան փողոցով, բայց թե այդ իրավիճակից մազապուրծ վարորդներից քանիսը հետագայում երթևեկության կանոնները խախտելու ծանուցում կստանան ու կտուգանվեն, այս պահին դժվար է ասել, բայց որ դա էլ կլինի, դժվար չէ ենթադրելը:
Մոտ 20 րոպե սպասելուց հետո երթուղայինի վարորդն էլ որոշեց շրջանցել ճանապարհի փակ հատվածը ու երթուղայինում իսկական քաոս սկսվեց: Մարդիկ սկսեցին հիշել ոչ վաղ անցյալի ընտրությունները, թե այդ ժամանակ ինչպես էին իշխանությունները սիրալիր դեմքով «համոզում», որ իրենց ընտրեն: Մի մասը հիշեց ընտրության ժամանակ բաժանած 5–ից 10 հազար դրամ կաշառքների պատմությունն ասեց. «…Փողով են եկել իշխանության, դրա համար հիմա էլ իրենց ոտքերն են մաքրում նույն այդ ժողովրդի վրա…»: Մի մասն էլ սկսեց օրինակներ բերել եվրոպաներից, թե՝ նույնիսկ մեգապոլիսներում նման գավառական վերաբերմունք չկա սեփական ժողովրդի հանդեպ և մարդիկ չեն էլ իմանում, թե ով երբ եկավ կամ գնաց:

Բազում այլ մտքեր էլ էին հնչում երթուղայինում, որը սովորական քաղաքացիներից բացի լավ կլիներ, որ լսեին նաև իշխանությունները, բայց շրջանցելով այդ դրվագն ընդամենը արձանագրենք, որ իրականում սա ևս մեկ անգամ փաստում է իշխանությունների փնթի ու անկազմակերպ լինելը:

Հակառակ դեպքում ինչ մի դժվար էր ճանապարհը «քըրթ» փակելուց առաջ, բոլոր ուղղություններից այդ հատված երթևեկող վարորդներին դեպի տարածքը շրջանցող այլ ճանապահ ուղղորդելը: Ու ամենևին էլ հակված չենք մտածելու, թե դա այնքան բարդ մաթեմատիկական խնդիր է, որ ճանապարհային ոստիկանության սովորական սպայի համար լուծելը դժվար է: Սա ընդամենը երկրի, քաղաքացու և սեփական մասնագիտությունը չհարգելու և հոգատարության բացակայության արդյունք է:

Հիմա հարց՝ սովորական քաղաքացին իշխանությունների հյուրերի և նման աշխատաոճի պատճառով ինչու պետք է աշխատանքի վայր, դպրոց, քննության կամ հիվանդանոց հասնի ուշացած ու նյարդայնացած, ինչ է թե իր ճանապարհը խաչվել է ղեկավարության ճանապարհի հետ:

Ու մի բան էլ՝ հարգելի իշխանություններ, եվրոպաների հետ համեմատվելու և տարբեր հարթակներում գերազանցիկ երևալուց առաջ լավ կլիներ, որ հիշեիք, որ նույն այդ եվրոպաներում ամեն օր հազար ու մի տեղից են տարբեր բարձրաստիճան պատվիրակությունների հյուրընկալում ու ճանապարհում, բայց դա երբեք ու երբեք սեփական ժողովրդի կյանքը կաթվածահար անելու հաշվին չեն անում:

Շարունակությունը` «Փաստ» օրաթերթի այսօրվա համարում