«Փաստ». «Ի՞նչ ստուգումների մասին ա խոսքը». «Դերժավայի Արկադ»

«Փաստ» օրաթերթը գրում է.

Չնայած ՍԱՊԾ խոսնակը տեղեկացրել է, որ սննդամթերքի անվտանգության պետական ծառայությունը ստուգումներ է սկսել ԱԺ Հանրապետական խմբակցության պատգամավոր Արկադի Համբարձումյանին (Դերժավայի Արկադ) պատկանող ընկերությունում, Արկադի Համբարձումյանը «Փաստի» հետ զրույցում պնդեց, որ որևէ ստուգում չի իրականացվում իր ընկերությունում: ՍԱՊԾ–ից հայտնել են նաև, որ ստուգումները կտևեն 2 օր:
Նշենք, որ մամուլում գրվել էր. որ «Սլավ Գրուպ» ընկերության կողմից ներմուծված «Nutricia Nutrilon» մանկական կերի վրա բացակայում է դրա բաղադրության վերաբերյալ հայերեն մակնշումը: «Սլավ գրուպ» ընկերության հետ կապված լուրը, որը ընկերության ներկրած մանկական կերն արտադրվել է Ադրբեջանի Հանրապետությունում, ձմռանը հերքեց ՍԱՊԾ–ն՝ հայտարարելով, որն «Nutrilon ProNutra» մանկական կերն արտադրված է Լեհաստանում (տուփի վրա նշված են տեղեկություններ մի քանի լեզուներով, այդ թվում՝ ադրբեջաներեն), և այստեղ չկա որևէ խախտում:

«Փաստը» զրուցեց «Սլավ գրուպի» սեփականատեր, ԱԺ ՀՀԿ պատգամավոր Արկադի Համբարձումյանի հետ:

– Պարոն Համբարձումյան, սննդամթերքի անվտանգության պետական ծառայությունը ուսումնասիրություններ է կատարում Ձեր ընկերությունում, ի՞նչ է պարզվել:

– Ես նմանատիպ բան չգիտեմ:

– Ստուգումներ չկա՞ն Ձեզ մոտ:

– Ոչ, ընդհանրապես, ի՞նչ ստուգումների մասին ա խոսքը: Գրել են, թե հայկական մակնշում չի եղել վրան, բայց դա անհնար բան ա: «Դանոն» ընկերության «Նուտրիլոն» կերը համար 1–ին կերն է աշխարհում երեխաների համար: Եվ մենք ստանում ենք կոնկրետ Լեհաստանից: Եվ Ադրբեջանն ա ստանում էդ գործարանից, և Վրաստանն ա ստանում: Ինչ–որ մեկին ձեռնտու ա էդ խաղերը տալ, ուրիշ բան չկա էդտեղ: Ո՞նց կարա ադրբեջանական արտադրության կերը գա Հայաստան, էս երկիրը սահման ունի, մաքսային ունի:

– Իսկ ինչպե՞ս ադրբեջանական խնձորները հայտնվեցին Հայաստանում:

– Էտի գնացեք խնձոր բերողին հարցրեք: Մեր ընկերությունը շատ խոշոր ընկերությունների հետ ա աշխատում, մենք երեխեքի կերի վրա խաղացող մարդիկ չենք, ծիծաղելի բաներ ա: Որևէ մեկին ձեռնտու ա, անընդհատ դնում, շահարկում են էս թեման:

– Իսկ Ձեր ասած «շահարկումը», ո՞ւմ է ձեռնտու: Ձեր մրցակիցների՞ն, ովքեր բերում են մանկական կեր:

– Չեմ կարա ասեմ, ես մրցակից չունեմ ընդհանրապես, չեմ կարա ասեմ՝ ովքեր են բերում: Համ էլ ես բիզնեսով չեմ զբաղվում, գնացեք տնօրենին հարցրեք: Կոնկրետ էդ կերը արտադրված է Լեհաստանում, աշխարհի ամենաանվտանգ կերերից է: Թե ում ա ձեռնտու ասել՝ վրեն գրված ա ադրբեջաներեն...: Շատ խոշոր ընկերությունների արտադրանքի վրա գրվում է տարբեր լեզուներով: Չի կարա հատուկ Հայաստանի համար գործարանը գրի մենակ հայերեն, Ադրբեջանի համար՝ ադրբեջաներեն: 3 լեզվով էլ գրում ա՝ վրացերեն, հայերեն, ադրբեջաներեն:

– Եթե այնուամենայնիվ, ՍԱՊԾ–ն որոշի, որ դա չի վաճառվելո՞ւ...

– Չի կարա նման որոշում լինի: ՍԱՊԾ–ն ասում է, հայերեն մակնշում չկա վրան, բայց դա էլ հնարավոր չի: ...կոնկրետ ես ինչի՞ պետք ա ադրբեջանական ապրանք ներմուծեմ, մի հատ սխալ բան անեմ: Աշխարհում էլ ապրանք չկա՞ր, որ պետք ա գնայի ադրբեջանական ապրանք ներմուծեի:

– Պարոն Համբարձումյան, անդրադառնանք Ձեր գործունեությանը ԱԺ–ում, Դուք պարբերաբար ընտրվում եք պատգամավոր, ի՞նչ եք պատրաստվում այս անգամ անել խորհրդարանում:

– Ինչ որ արել եմ 3 անգամ. իմ ժողովրդի կողքին եմ լինելու:

– Խոսքն ինչի՞ մասին է, քանի որ օրենսդրական նախաձեռնություններով հանդես չեք եկել:

– Կգա ժամանակը կտեսնեք: Ի՞նչ գիտեք՝ եկել եմ, թե չեմ եկել, պիտի հելնեի՞, խոսայի՞, որ օրենսդրական նախաձեռնություն լիներ:

Խմբագրության կողմից. «Փաստը» հունիսի 20–ի համարում անդրադարձել է «Սլավ Գրուպ» ընկերության կողմից ներմուծված «Նուտրիցիա Նուտրիլոն Պրոնուտրա Պլյուս» ապրանքանիշի 1,2,3 տեսականիներին: Նշենք, որ մեր դիտարկումների արդյունքները ցույց են տվել, որ նշված մանկական կերերի կափարիչների վրա եղել են հայերեն մակնշումներ, սակայն տուփի վրայի հիմնական մակնշումը ադրբեջաներենով և ռուսերենով է եղել, իսկ տուփի հետևի մասում, ադրբեջաներեն և կիրգիզերեն գրառումնեից բացի տուփի վրա եղել է նաև ադրբեջանական ֆեյսբուքյան «Ֆան» ակումբի գովազդը, որը քողարկված է եղել «Սլավ Գրուպ»–ի կպչուն պիտակով:
Ինչ վերաբերում է ՍԱՊԾ–ի՝ նշված ապրանքանիշը ԵԱՏՄ միասնական ռեեստրում գրանցված լինելու հանգամանքին, ապա այս պահին այդ տեղեկությունը ճշտվում է, որի մասին կտեղեկացնենք հետագայում:

Շարունակությունը` «Փաստ» օրաթերթի այսօրվա համարում