Հորդառատ անձրևը կես ժամում ավերել է Գորիսը (լուսանակարներ, տեսանյութ)

Հունիսի 22-ին հորդառատ անձրևի հետևանքով ավերածություններ են եղել Գորիս քաղաքում: Այս մասին ԼՈւՐԵՐ.com-ի թղթակցի հետ զրույցում ասաց Գորիս համայնքի ղեկավարի մամուլի խոսնակ Արևիկ Աբելյանը:

«Առավոտյան ժամերին մոտ 30 րոպե տևած տեղումները բավականին մեծ ավերածություններ են արել. գրեթե բոլոր թաղամասերում խնդիրներ են առաջացրել՝ լցվելով բակ ու տուն, քանդելով տան հիմքերն ու պատերը: Վարար անձրևը քանդել է անգամ ասֆալտապատ հատվածներն ու խոր փոսեր առաջացրել: Գերեզմանները հայտնվել են մեծ քարերի ու ավազների տակ, իսկ որոշ թարմ շիրիմների տեղն անգամ նշմարելի չէ»,- նշեց նա:

Աբելյանի խոսքով՝ չեն դադարում տարբեր թաղամասերից այցերն ու զանգերը Գորիսի համայնքապետարան. «Համայնքապետարանի համապատասխան մասնագետներն արդեն շրջայց են կատարել, փորձելով կանխել հետագա վնասները: Գլխավոր ճարտարապետ Գարեգին Փարսյանը վստահեցնում է՝ քաղաքի 5 հեղեղատարն էլ գործել է, սակայն Գորիսի գոգավոր դիրքով պայմանավորված, անձրևը սարերից և ճանապարհներից քարերն ու ավազը բերել և առուներում, խողովակներում խցանումներ է առաջացրել: Ճարտարապետն ասաց նաև, որ անելիքներ հաստատ կան՝ առուների, խողովակների հեղեղատարների վերանորոգման գործում»,- ասաց նա՝ ավելացնելով, որ այժմ բոլորի՝ բնակիչների, համապատասխան կառույցների ուժերով փորձում են կարգի բերել քաղաքը:

Նա նշեց նաև՝ թեև հորդառատ անձրևը դադարել է, բայց տեղումները ժամանակ առ ժամանակ շարունակվում են:

Սոնա Հարությունյան