Մենք պետք է պարտք վերցնենք, որ տնտեսությունը զարգանա. Վարդան Արամյան

Ազգային ժողովում «Հայաստանի Հանրապետության 2016 թ. պետական բյուջեի կատարման մասին» տարեկան հաշվետվության ժամանակ ֆինանսների նախարար Վարդան Արամյանը ներկայացրեց նախարարության կատարած աշխատանքները, ծախսած միջոցներն արտաքին և ներքին պարտքի վերաբերյալ վիճակագրությունը:

Նախարարի ներկայացրած վիճակագության համաձայն՝ ՀՀ արտաքին պարտքը շարունակում է աճել, մոտենալով ՀՆԱ-ի 50 տոկոսին: Հարցին՝ մինչև ե՞րբ պետք է պետությունը պետական պարտքն  ավելացի, նախարարը նշեց, որ պարտքի մեծացումը խնդիր չէ և անհայտ է, որ եթե պետության եկամուտները չեն հերիքում, ստիպված պետք է պարտք վերցնել: «Մենք շարունակելու ենք պարտք վերցնել, բայց պետք է նաև կամաց-կամաց կարգավորենք հարաբերական ցուցանիշները, բայց հստակ  է մի բան՝ մենք պետք է պարտք վերցնենք, որ տնտեսությունը զարգանա և պարտք-ՀՆԱ ցուցանիշը պետք է կարգավորենք և պետք է ջանքեր գործադրենք, որ մեր ծախսերը վերաիմաստավորենք, որը կտանի տնտեսության զարգացմանը»,-նշեց նախարարը: 

Խոսելով կատարած ծախսերի մասին՝ նախարարը նշեց, որ մեր ընդհանուր ծախսերը կազմել են 1449,1մլրդ դրամ, որի մեջ փոքր թիվ են կազմում կապիտալ ծախսերը, որի հետևանքով դժվար է տնտեսության զարգացման մասին խոսել. «Տնտեսության զարգացում և տնտեսական աճ ունենալու համար պետք է կապիտալ ծախսերն ավելացնել»,-շեշտեց Արամյանը: 

Նախարարը նաև հավելեց, որ պետութունը որդեգրել է այնպիսի քաղաքականություն, որ տեղեկատվական տեխնոլոգիաների զարգացման և կիրառման շնորհիվ հնարավոր լինի ցանկացած աշխատանքի ՕԳԳ-ն բարձրացնել, միևնույն ժամանակ՝  նվազեցնել աշխատողների թիվն, ինչն էլ կբերի ծախսերի կրճատման: