ՀՅԴ-ն երաշխիքներ է ուզում

ՀՅԴ խմբակցության քարտուղար Աղվան Վարդանյանը «Երկիր Մեդիայի» եթերում օրեր առաջ հայտարարել է, որ դեսպան Սվիտալսկիի հայտնի հայտարարությանը ՀՀԿ արձագանքը չափից ավելի կոշտ էր:

Դաշնակցության այդ գնահատականը բավականին ուշագրավ է՝ նկատի ունենալով, որ այն վերաբերում է կոալիցիոն գործընկերոջ պահվածքին: Աղվան Վարդանյանը փաստորեն արտահայտում է դրա հետ անհամաձայնություն, իհարկե՝ ոչ ուղղակի, այլ, այսպես ասած, դիվանագիտական տողատակով: Աղվան Վարդանյանի հայտարարությունը ՀՅԴ-ին հեռանկարային ռիսկերից ապահովագրելու քայլ է:

Տեղին է հիշեցնելը, որ Սերժ Սարգսյանը ՀՅԴ–ից դժգոհելու պատճառ չունի, քանզի այդ ուժը քաղաքական ամենալարված փուլերում հրապարակային կամ ոչ հրապարակային տարբերակով մշտապես սատարել է նրան և յուրօրինակ ականի դեր կատարել ընդդիմադիր դաշտում։ Բացառությունը 2012–ի խորհրդարանական ընտրություններն էին, երբ ՀՅԴ–ն անկեղծորեն պայքարում էր իշխանությունների դեմ հանուն իշխանափոխության։ ՀՅԴ–ում այսօր լավ գիտեն, որ իրենց «սկզբունքայնության» և տարատեսակ գործարքների արդյունքում գրեթե զրոյական վարկանիշ ունեն և որևէ շանս չունեն ապագա խորհրդարան մուտք գործելու համար։ Բացի վարկանիշից՝ չկա նաև անհրաժեշտ ֆինանսական ռեսուրսը. Սարգսյանն այդ առումով ակնհայտորեն նրանց երես չի տվել, դե, իսկ Հրանտ Մարգարյանը, ըստ լավատեղյակների, սիրում է նախ իր անձնական «բոստանը» ջրել, ապա նոր միայն կուսակցական «արտը»։ Մի խոսքով, ՀՅԴ–ն ո՛չ վարկանիշ ունի, ո՛չ փող ունի, ո՛չ էլ վարչական ռեսուրս, որպեսզի 2022–ի համար երաշխավորված զգա իրեն, երբ կավարտվի կոալիցիոն պայմանագրի գործունեության ժամկետը:

ՀՅԴ-ն կոալիցիոն գործընկեր է, սակայն որևէ երաշխիք չկա, որ 2018 թվականին իշխանության հարցի այս կամ այն հանգուցալուծումից հետո ՀՅԴ-ի անհրաժեշտությունը ՀՀԿ-ի համար կարող է կտրուկ նվազել, և եթե անգամ կոալիցիան շարունակվի մինչև 2022 թվական, ինչպես պայմանավորվել են, ապա, միևնույն է, 2022 թվականից արդեն ՀՀԿ-ն իր ձեռքերը կհամարի ազատված: Հենց այս սցենարն էլ աչքի տակ ունենալով Դաշնակցությունը պարբերաբար օգտագործելու է պատեհ առիթները թե՛ ՀՀԿ-ի մոտ երաշխիքները մեծացնելու, թե՛ դրսում երաշխիքային նախադրյալներ ստեղծելու համար՝ 2022 թվականին ընդառաջ:

Ստելլա Խաչատրյան