Փորձում ենք նորից պատմություն կերտել. Աբրահամ Խաշմանյան

Չեմպիոնների լիգայի որակավորման առաջին փուլի առաջին հանդիպման շրջանակում Հայաստանի չեմպիոն «Ալաշկերտ»-ը կընդունի Անդորրայի չեմպիոն «Սանտա-Կոլոմա»-ին:

Խաղից առաջ հայկական թիմի գլխավոր մարզիչ Աբրահամ Խաշմանյանը հանդիպեց լրագրողներին:

Խոսելով թիմի նորեկների մասին մարզիչը կածրիք հայտնեց, որ նորեկները այդքան էլ լավ մարզավիճակում չեն և ընդամենը տասը օր եղել իրենց տրամադրության տակ խաղային որակը բարելավելու համար: Մարզիչը հայտնեց նաև, որ նորեկները կլինեն հայտացուցակում, բայց մեկնարկում չեն լինի, թեպետ երկուսն էլ բավականին բարձր մակարդակի խաղացողներ են:

Անդրադառնալով «Սանտա-Կոլոմա»-ի թիմին մարզիչն ասաց. «Գիտենք, որ 5-6 հոգի նոր ֆուտբոլիստ ունեն, ովքեր խաղում են ազգային հավաքականում: Ստացվում է` վաղը խաղալու ենք ոչ թե ակումբի, այլ` Անդորրայի հավաքականի հետ: Մեզ սպասվում է բավականին բարդ հանդիպում: Եթե հիշում եք, օրեր առաջ Անդորրան հաղթեց Հունգարիային: Չնայած դրան, մենք մարտական ենք տրամադրված, ինչպես միշտ կաշխատենք ուրախացնել երկրպագուներին: Թիմի նպատակն է անցնել հաջորդ փուլ: Չեմ ասի, թե մեր թիմը գտնվում է գագաթնակետին, մեր մոտ առաջնությունը վերջացել է, թիմը գնացել էր հանգստի, 15 օր ենք ունեցել»:

Մարզիչը նշեց նաև, որ թիմը պատրաստ է լավ ֆուտբոլ ցույց տալուն. «Մեկ տարվա ընթացքում մենք ավելի ուժեղ ենք դարձել պաշտպանությունում, բայց մենք այդքան հզոր չենք հարձակման գծում: Չունենք Էբերի նման ֆուտբոլիստ: Արտակ Գրիգորյանը փորձաշրջան է անցնում այլ ակումբում:  Նա մեզ համար կորուստ է, քանի որ առանցքային խաղացող է: Այսօր դժվար է գտնելը հարձակվող, քանի որ լավ որակի խաղացողները Հայաստան շատ քիչ են գալիս»:

 Խոսելով  հանդիպման կարևորության մասին մարզիչն ասաց.

«Մեր համար բոլոր հանդիպումներն են շատ կարևոր, դա ակումբի և իմ փիլիսոփայության մեջ է մտնում: Ակումբը հինգ տարվա պատմություն ունի և բավականին հաջողությունների է հասել: Վաղվա հանդիպումը շատ կարևոր է: Փորձում ենք նորից պատմություն կերտել, որը արել ենք նաև դրանից առաջ: Ձգտելու ենք  ուրախացնել երկրպագուների, ժողովրդին»