«11 մլրդ դրամը թերակատարվել է. դա հո փոքր թիվ չէ՞»

ՀՀ Ֆինանսների նախարարի տեղակալ Ատոմ Ջանջուղազյանն, ամփոփելով 2016 թվականի ֆինանսական տարին, նշեց, որ նախորդ տարվա ընթացքում 11 մլրդ դրամի դրամաշնորհային պարտավորություն թերակատարվել է և համապատասխան միջոցառումները չեն կատարվել:

Պաշտոնյայի այս դիտարկումը զայրացրեց պատգամավոր Խոսրով Հարությունյանին. «Իսկ ինչո՞ւ է թերակատարվել այդքան գումարի համար նախատեսված ծրագիրը: Դե, եթե  էդպես շարունակվի, կարող եք ասել, որ 30 մլրդ դրամի ծրագիր էլ եք թերակատարել, 11 մլրդ դրամը թերակատարվել է. դա հո փոքր թիվ չէ՞»:

Պատգամավորի դիտարկմանն ի պատասխան՝ Ատոմ Ջանջուղազյանը պատասխանեց, որ իրենք ընդունում են, որ 11մլրդ դրամը փոքր թիվ չէ, բայց դրամաշնորհային ծրագրերը թերակատարվել են ծրագրերի բացակայության պատճառով և 11մլրդ-ը փոխանցվել է հաջորդ տարվա ծրագրերի համար: 

Ֆինանսական բլոկի պաշտոնյան, խոսելով վիճակագրական ցուցանիշների մասին, ասաց, որ ծրագրվել էր ունենալ ՀՆԱ/հարկեր 20.7%-անոց ցուցանիշ, բայց հարկերը 0.6%-ով ավելի են հավաքագրվել, ԱԱՀ-ն կազմել է 391 մլրդ դրամ, եկամտային հարկը` 332.7 մլրդ դրամ, շահութահարկը` 127.2 մլրդ դրամ: