Ինձ ավելի հպարտ զգացի. Հովհաննես Բաչկովը՝ Եվրոպայի չեմպիոն դառնալու մասին

Բռնցքամարտի Եվրոպայի առաջնությունում ոսկե մեդալ նվաճելուց հետո Հովհաննես Բաչկովը հանդիպեց լրագրողներին:

Ասուլիսի ժամանակ մարզիկը խոսեց իր չեմպիոնության և պրոֆեսիոնալ ռինգ տեղափոխվելու ցանկության մասին:

«Մտադիր եմ  հանդես գալ պրոֆեսիոնալ ռինգում: Բայց հիմա նախապատրաստվում եմ աշխարհի առաջնությանը:

Բոլորին էլ հայտնի էր, որ ինչ -ինչ պատճառներով չէր հաջողվում ավելի շուտ մրցանակ նվաճել: Երբեմն խանգարում էր մրցավարական գործոնը, երբեմն էլ՝ մարզավիճակս: Այս անգամ լավ մարզավիճակում եմ: Կարողացա հաղթանակի հասնել  նաև թիմային համախմբվածության շնորհիվ: Մրցավարներն էլ իրենց գործը լավ կատարեցին»:

Այն դիտարկմանը, որ կարիերայի ընթացքում շատ անարդարությունների է հանդիպել, ի՞նչն է մոտիվացրել մրցույթները շարունակելու համար, մարզիկը նշեց.

«Այն միտքը, որ մեդալ չէի նվաճել, ինձ տանջում էր: Չէի կարող պրոֆեսիոնալ  բռնցքամարտ տեղափոխվել սիրողական  բռնցքամարտում՝ առանց  մեդալ նվաճելու»:

Վերջում Եվրոպայի նորընծա չեմպիոնը շնորհակալություն հայտնեց բոլոր նրանց, ովքեր իր հաղթանակի  համար ուրախացել են:

«Շնորհակալություն բոլոր նրանց, ովքեր կիսեցին հաղթանակս: Ուզում եմ շնորհակալություն հայտնել Խարկովի հայերին՝ աջակցության համար: Մենամարտից հետո հայկական դհոլի  ձայնը էմոցիաներ տվեց: Ինձ ավելի հպարտ զգացի:

Շնորհակալ եմ մեր հայ ազգից, զգացել եմ նրանց վստահությունն ու աջակցությունը»: