Մասնագետի խորհուրդները. ինչպես զովանալ ամռան տապին

Ջրազրկումից խուսափելու համար պետք է խմել օրական 2լ սովորական ջուր։ Այս մասին այսօր լրագրողների հետ հանդիպման ժամանակ ասաց ՀՀ ԱՆ հիվանդությունների վերահսկման և կանխարգելման ազգային կենտրոնի գլխավոր տնօրենի տեղակալ Նունե Բակունցը՝ խոսելով եղանակի ջերմաստիճանի կտրուկ բարձրացման և դրա հետևանքների մասին։

Բակունցի խոսքով՝ ջրազրկման արդյունքում մարդն ունենում է ավելորդ գրգռվածություն, հոգնածություն, ուժերի սպառում․ 

«Ամռանը հարկավոր է օգտագործել մեծ քանակությամբ հեղուկ։ Հատկապես սովորական ջուր կամ թան, հանքային ջուր։ Ամռանը մենք կորցնում են աղեր, որը լրացվում է հենց թանի միջոցով։ Պետք է օգտագործել ինչպես տաք․ այնպես էլ սառը հեղուկներ։ Այն ըմպելիքները, որոնք ջրազրկման դեմ են պայքարում, պետք է լինեն ոչ թե սառեցված, այլ զովացված։ Կարելի է օգտագործել նաև քիչ քանակությամբ, բայց առանց շաքարի կանաչ թեյ, պետք է թեյը չչարաշահել, քանի որ այն իր մեջ կոֆեին է պարունակում»,-նշեց մասնագետը՝ խորհուրդ տալով առողջական խնդիրներից զերծ մնալու համար խուսափել արևի ճառագայթներից, քանի որ ուլտրամանուշակագույն ճառագայթները թեև փոքր-ինչ դրական ազդեցություն ունեն, սակայն 15 րոպե անց կարող է դառնալ այրվածքների պատճառ։

«Պետք է պաշտպանվել արևի ճառագայթներից, հատկապես՝ ժամը 12.00-ից մինչև 17.00-ն ընկած ժամանակահատվածը։ Պետք չէ մնալ արևի ուղիղ ճառագայթների տակ։ Սրա հետ մեկտեղ հարկավոր է խուսափել նաև փակ տարածքներից, օրինակ, երեխային չպետք է թողնել մեքենայի մեջ, որը կարող է բերել վատ հետևանքների»,-ասաց Նունե Բակունցը։

Սեզոնի վնասակար շոգից խուսափելու համար բանախոսը խորհուրդ տվեց նաև հագնել բաց գույնի բամբակե հագուստ, օգտագործել ակնոց և գլխարկ։

Նա նշեց՝ աղիքային ինֆեկցիան սիրում է տաքություն և ակտիվանում է հատկապես ամռանը․ «Կանխարգելման համար պետք է հետևել հիգիենային՝ ձեռքերը օճառով հաճախ լվանալ։ Մեծ ուշադրություն դարձնել սննդամթերքի մաքրությանը և թարմությանը և խուսափել փողոցային առևտրից»,-ասաց ՀՀ ԱՆ հիվանդությունների վերահսկման և կանխարգելման ազգային կենտրոնի գլխավոր տնօրենի տեղակալը։

Վերջում նա ընդգծեց՝ ջրում զովանալը ամռանը բոլորի սիրելի զբաղմունքներից է, սակայն հարկավոր է լողալ լողի համար նախատեսված վայրերում, որտեղ կլինեն անհրաժեշտ հիգիենիկ պայմաններ, բավարար ծածկույթ՝ վնասակար ազդեցությունից խուսափելու համար։

 Սոնա Հարությունյան