Սպանությունը բացահայտվել է. 22-ամյա երիտասարդը խոստովանել է, որ ինքը ծալովի դանակով մի քանի անգամ հարվածել է տաքսու վարորդին

Գագիկ Շամշյանը հայտնում է 19 Նոյեմբեր, 2011 9:38

Երեկ` նոյեմբերի 18-ին, ոստիկանության Երևան քաղաքի վարչության քրեական հետախուզության բաժնի և ոստիկանության Էրեբունու բաժնի քրեական հետախուզության բաժնի աշխատակիցները, ձեռնարկելով օպերատիվ-հետախուզական միջոցառումներ, ոստիկանության Էրեբունու բաժին են բերման ենթարկել մի խումբ երիտասարդների:

Ինչպես ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, նշված երիտասարդներն են` Խաղաղ Դոն փողոցի 19 շենքի բնակիչ, 20-ամյա Կարապետ Մելքոնյանը, Արարատի մարզի Հովտաշատ գյուղի բնակիչներ, եղբայրներ, 24-ամյա Միքայել Ռաֆայելյանը, 22-ամյա Վլադիմիր Ռաֆայելյանը և Արզումանյան փողոցի 16/2 շենքի բնակիչ, 22-ամյա Հակոբ Բունիաթյանը:

Նշված երիտասարդները կասկածվում են նոյեմբերի 16-ի լույս 17-ի գիշերը Էրեբունի վարչական շրջանում տեղի ունեցած սպանության փաստով:

Ինչպես ավելի վաղ ԼՈՒՐԵՐ.com-ին հայտնել էր ֆոտոլրագրող Գագիկ Շամշյանը, Էրեբունի վարչական շրջանում տեղի էր ունեցել սպանություն, որի արդյունքում հիվանդանոցում մահացել էր «Վոլվո» մակնիշի 09 ՍԼ 181 համարանիշի տաքսի ավտոմեքենայի վարորդը` 26-ամյա Գալուստ Մելքոնյանը:

Ձեռնարկված օպերատիվ-քննչական գործողությունների արդյունքում Հակոբ Բունիաթյանը ոստիկանության Էրեբունու բաժնում խոստովանել է, որ նոյեմբերի 18-ին` ժամը 02.00-ի սահմաններում, Խաղաղ Դոն փողոցի թիվ 19ա հասցեում գտնվող ավտոկայանատեղիի պարսպի հետնամասում վիճաբանության ժամանակ իր մոտ եղած ծալովի դանակով չորս անգամ հարվածել է Գալուստ Մելքոնյանի աջ ծնկի շրջանին, որի հետևանքով Մելքոնյանը տեղափոխվել էր Էրեբունի բժշկական կենտրոն, որտեղ էլ մահացել էր:

Փաստի առթիվ ոստիկանության քննչական գլխավոր վարչության Էրեբունու քննչական բաժնում հարուցվել է քրեական գործ` ՀՀ քրօր.-ի 104 հոդվածի հատկանիշներով:

Հակոբ Բունիաթյանը քննիչի որոշմամբ ձերբակալվել է:

Իսկ նրա երեք հանցակիցները ստորագրությամբ ազատ են արձակվել:

Լուսանկարները և տեսանյութը` Գագիկ Շամշյանի