Քրդստանի վարչապետ Նեչիրվան Բարզանին բավականին ուշագրավ հայտարարություններ է արել

Կարեն Հովհաննիսյանը facebook սոցցանցի իր էջում գրում է.

Քրդստանի վարչապետ Նեչիրվան Բարզանին այսօր բավականին ուշագրավ հայտարարություններ է կատարել, որոնք մեսիջներ էին ուղղված ինչպես Բաղդադին, այնպես էլ Անկարային և Թեհրանին:
Նեչիրվան Բարզանին Բաղդադի հետ բանակցությունների հարցով պնդել է, որ չնայած այն բանին, որ եղել են հանդիպումներ և բանակցություններ, սակայն դեռևս վերջնական փաստաթուղթ չի ստորագրվել: Այս հայտրարությամբ նա փաստում է, որ այնուամենայնիվ կան որոշակի համաձայնություններ, որոնք դեռևս վերջնական տեսքի չեն բերվել:

Բարզանին մեկ այլ հետաքրքրիր հայտարարություն էլ է կատարել: Նա ասել է, որ Էրբիլը պատրաստ է բանակցություններ վարել և երկխոսության նստել ոչ միայն Իրաքի կառավարության հետ, այլ նաև Իրաքի բոլոր քաղաքական ուժերի հետ: 

Այս հայտարարությունը ինձ հուշում է, որ Էրբիլի և Բաղդադի բանակցային սեղանին մի այնպիսի փաստաթուղթ է դրված, որը պետք է ընդունի խորհրդարանը և Բարզանին հենց դրա համար ցանկանում է նաև երկխոսություն սկսել քաղաքական ուժերի հետ:

Քրդստանի վարչապետը կարևորել է նաև Թուրքիայի և Իրանի հետ հարաբերությունների կարգավորումը, հատկապես նշելով, որ իրենք չեն մոռանում թե՛ Թուրքիայի հետ լավ հարաբերությունները ոչ վաղ անցյալում, թե Իրանի տնտեսական օգնությունը Քրդստանին, նույնպես ոչ վաղ անցյալում:

Նեչիրվան Բարզանիի խոսքից պարզ է դառնում, որ քրդական կառավարությունը պատրստ է զիջել բոլոր նավթային ռեսուրսները Իրաքի կառավարությանը, եթե Իրաքի կառավարությունը Իրաքի ընդհանուր նավթի 17%-ը ուղղի Քրդստանին, ինչն էլ սահմանադրությամբ ամրագրված է: Սակայն , ինչպես հայտնի է , Իրաքի կառավարությունը, նույնպես վկայակոչելով երկրի սահմանադրությունը, պնդում է, որ Քրդստանին հասնում է ընդհանուր նավթի 12.5%-ը: 
Այնուամենայնիվ Քրդստանի փաստացի ղեկավար Նեչիրվան Բարզանիի այսօրվա ելույթի մեխը խաղաղությունն էր, Իրաքի և Քրդստանի միջև առկա խնդիրները խաղաղ ճանապարհով լուծելը: