Երևանի Վարդանանց փողոցում բռնկված խոշոր հրդեհը մեկուսացված է (ֆոտոռեպորտաժ)

Այսօր՝ նոյեմբերի 20-ին, հրդեհ է բռնկվել Երևանում:

Ինչպես դեպքի վայրից ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, ժամը 13.30-ի սահմաններում Արտակարգ իրավիճակների նախարարության Հայաստանի փրկարար ծառայության հակաճգնաժամային կենտրոն ահազանգ է ստացվել, որ Վարդանանց 100 հասցեում հրդեհ է բռնկվել:

Հրդեհի վայր էին ժամանել հրշեջների 2 մարտական հաշվարկ:

Պարզվել է, որ այրվում է սեփական տան հարակից տարածքը, որտեղ գտնվում են տնտեսական իրեր, հագուստ:

Ըստ հրշեջների' այրվել է մոտ 40 մետր քառակուսի տարածք և դրա տանիքը:

Բարեբախտաբար, զոհեր և վիրավորներ չկան:

Հարևանները ֆոտոլրագրողին պատմել են, որ այրված տանն էր ապրում մի տարեց տատիկ, ում քաղաքացիները հրշեջների օգնությամբ կարողացել են դուրս բերել տնից:

Այս պահին հրդեհն ամբողջովին մեկուսացվել է հրշեջների կողմից:

Դեպքի վայրում հրդեհաշիջման աշխատանքները ղեկավարում էր ՀՀ արտակարգ իրավիճակների նախարարության Հայաստանի փրկարար ծառայության հրդեհաշիջման կազմակերպման բաժնի ղեկավար Սարգիս Ավետիսյանը:

Հրդեհի վայրում հավաքված հարևանները ֆոտոլրագրող Գագիկ Շամշյանին պատմել են, որ բարեբախտաբար, և՛ հրշեջները, և՛ գազի գրասենյակի աշխատակիցները, և՛ էլեկտրացանցի աշխատակիցները ժամանակին են հասել դեպքի վայր և կարողացել են նշված տարածքում ամբողջովին անջատել էլեկտրականությունը և բնական գազը:

Հարևանները ֆոտոլրագրողին պատմել են նաև, որ եթե հրշեջներին չհաջողվեր արագ մեկուսացնել կրակը, մեկ-երկու րոպե ուշացման դեպքում կրակը կտարածվեր հարակից սեփական տներով:

Դեպքի վայր էին ժամանել նաև Երևանի ճանապարհային ոստիկանության մեծ թվով աշխատակիցներ, ովքեր նշված հատվածում արգելում էին ավտոմեքենաների տեղաշարժը, որպեսզի հրշեջները կարողանան անարգել կատարել իրենց աշխատանքը:

Դեպքի վայր էին ժամանել նաև 1-03 ծառայության' շտապօգնության 2 բրիգադ:

Հրդեհի վայրը գտնվում է ոստիկանության Կենտրոնականի բաժնի Նորք-Մարաշի ոստիկանության բաժանմունքի դիմաց:

Լուսանկարները՝ Գագիկ Շամշյանի