Դատարանը երկամսյա կալանք տվեց 58-ամյա մարդասպանին, ով ծեծելով սպանել էր 29-ամյա աղջկան (ֆոտո, տեսանյութ)

Այսօր՝ նոյեմբերի 20-ին, Լոռու մարզի Ընդհանուր իրավասության դատարանի Վանաձորի նստավայրում ավարտվեց դռնփակ դատական նիստը:

Ինչպես ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, նշված դատարան էր տեղափոխվել Լոռու մարզի Ստեփանավան քաղաքի բնակիչ 58-ամյա Արշավիր Դեմիրխանյանը:

Նշված դատարանին միջնորդություն էր ներկայացրել ոստիկանության քննչական գլխավոր վարչության Լոռու մարզի քննչական բաժնի Ստեփանավանի քննչական բաժանմունքի քննիչը, միջնորդություն, որպեսզի Դեմիրխանյանի նկատմամբ որպես խափանման միջոց ընտրվի երկամսյա կալանքը:

Նշված դատարանի դատավոր Մուշեղ Հարությունյանը, դռնփակ դատական նիստից հետո վերադառնալով խորհրդակցական սենյակից, բավարարեց քննչական մարմնի միջնորդությունը, և 58-ամյա Արշավիր Դեմիրխանյանի նկատմամբ որպես խափանման միջոց ընտրվեց երկամսյա կալանքը:

Ինչպես ավելի վաղ ԼՈՒՐԵՐ.com-ին Ստեփանավանից հայտնել էր ֆոտոլրագրող Գագիկ Շամշյանը, ժամը 22-40-ի սահմաններում Ստեփանավան բժշկական կենտրոնից ոստիկանության Ստեփանավանի բաժին հայտնել են, որ գլխուղեղային փակ տրավմա, գլխի մասում ստացած սալջարդ, ուղեղային կոմա ախտորոշմամբ, անգիտակից վիճակում իրենց մոտ է տեղափոխվել երիտասարդ մի աղջիկ:

Հիվանդանոց մեկնած ոստիկանության Ստեփանավանի բաժնի օպերատիվ-քննչական խումբը պարզել է, որ հիվանդանոց տեղափոխվածը 29- ամյան Ինգա Շիշլոն է:

Այսօր' նոյեմբերի 17-ի լույս 18-ի գիշերը ժամը 02.00-ի սահմաններում, Ի. Շիշլոն հիվանդանոցի վերակենդանացման բաժանմունքում մահացել է:

Ձեռնարկված օպերատիվ-քննչական աշխատանքների արդյունքում ոստիկանության Լոռու մարզային վարչության և Ստեփանավանի բաժնի աշխատակիցները պարզել են, որ նոյեմբերի 17-ին' ժամը 21-30-ի սահմաններում, Ստեփանավանի «Անահիտ» հանգստյան տան պահակակետում վիճաբանություն է տեղի ունեցել նշված հանգստյան տան պահակ 58-ամյա Արշավիր Դեմիրխանյանի և 29- ամյան Ինգա Շիշլոյի միջև:

Դեպքի վայր են ժամանել ոստիկանության Լոռու մարզային վարչության օպերատիվ խումբը՝ վարչության պետ Անուբախ Ղամբարյանի գլխավորությամբ։

Դեպքի վայր են ժամանել նաև ոստիկանության քննչական գլխավոր վարչության Լոռու քննչական բաժնի քննիչները՝ բաժնի պետ Գագիկ Իսպիրյանի գլխավորությամբ։ Հանցագործության վայր էին ժամանել նաև ոստիկանության Ստեփանավանի բաժնի աշխատակիցները՝ բաժնի պետ Ավետիք Ավետիսյանի գլխավորությամբ։

Դեպքի վայր էին ժամանել նաև ոստիկանության քննչական գլխավոր վարչության Ստեփանավանի քննչական բաժանմունքի քննիչները՝ բաժանմունքի պետ Արման Գալստյանի գլավորությամբ։ Դեպքի վայրում քննչական աշխատանքները ղեկավարում էր Ստեփանավանի քննչական բաժանմունքի քննիչ Սերգեյ Սերոբյանը։

Պարզվել է, որ վիճաբանության ժամանակ պահակը ձեռքերով, ոտքերով և ապակյա շշով հարվածներ է հասցել երիտասարդ աղջկան: Փաստի առթիվ ոստիկանության քննչական գլխավոր վարչության Լոռու մարզի քննչական բաժնի Ստեփանավանի քննչական բաժանմունքում հարուցվել է քրեական գործ' ՀՀ քրօր.-ի 104 հոդվածի 1-ին մասի (սպանություն) հատկանիշներով:

Ա. Դեմիրխանյանը քննիչ Սերգեյ Սերոբյանի որոշմամբ ձերբակալվել և տեղափոխվել է ոստիկանության Ստեփանավանի բաժնի ձերբակալվածների պահման վայր: Քննիչի որոշմամբ նշանակվել են նաև մի շարք փորձաքննություններ։

Ֆոտոլրագրող Գագիկ Շամյանը հայտնեց նաև, որ սպանություն կատարողը նախկինում մի քանի անգամ դատված է եղել, այդ թվում՝ սպանության փորձ կատարելու համար։

Լուսանկարները և տեսանյութը՝ Գագիկ Շամշյանի