Ավազակային հարձակում Ողջաբերդ գյուղում. դիմակավորված հանցագործները բռնություն են կիրառել թոշակառու ամուսինների նկատմամբ (ԼՐԱՑՎԱԾ՝ ՖՈՏՈ, ՏԵՍԱՆՅՈՒԹ)
Գագիկ Շամշյանը հայտնում է
Այսօր` նոյեմբերի 21-ին, ավազակային հարձակում է տեղի ունեցել Կոտայքի մարզում: Ինչպես դեպքի վայրից ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, գիշերը ժամը 03.40-ի սահմաններում ոստիկանության Կոտայքի բաժին ահազանգ է ստացվել, որ ավազակային հարձակում է տեղի ունեցել Կոտայքի մարզի Ողջաբերդ գյուղի բնակիչներ` 74-ամյա Արամայիս Պապիկյանի և 71-ամյա Սեդա Պապիկյանի տան վրա (երկուսն էլ թոշակառու են):
Դեպքի վայր են ժամանել ոստիկանության Կոտայքի մարզային վարչության օպերատիվ խումբը` վարչության պետ Արմեն Վաթյանի գլխավորությամբ:
Դեպքի վայր էին ժամանել նաև ոստիկանության Կոտայքի մարզի քննչական բաժնի քննիչները` բաժնի պետ Վալենտին Պապյանի գլխավորությամբ:
Ողջաբերդ գյուղ մեկնած ոստիկանության օպերատիվ խումբը պարզել է, որ նոյեմբերի 20-ին` ժամը 19.00-ի սահմաններում, 3 հոգի` դիմակավորված, ատրճանակով ու դանակներով զինված, մուտք են գործել Պապիկյանների տուն, ատրճանակի և դանակի սպառնալիքի տակ բռնություններ կիրառել ծերունի ամուսինների նկատմամբ, այնուհետև կպչուն ժապավենով կապկպել են նրանց, ծեծի ենթարկել, ապա գիշերը մոտավորապես 01.50-ին Պապիկյանների տնից հափշտակել են 7,200 ԱՄՆ դոլար, 1 պարկ ընկույզ, «Նաիրի» տեսակի մի քանի շիշ կոնյակ, 1 դույլ նուշ և դիմել են փախուստի:
Արամայիս Պապիկյանը մարմնական վնասվածքներով տեղափոխվել է Սուրբ Գրիգոր Լուսավորիչ բժշկական կենտրոն:
Դեպքի վայրում հավաքվածները ֆոտոլրագրող Գագիկ Շամշյանին պատմել են, որ Պապիկյանները դաժան ծեծի և խոշտանգումների են ենթարկվել. այդ պահին նրանք տանը եղել են մենակ:
Հանցագործները ոչ միայն տակնուվրա են արել տունն ու նկուղը, այլև կատարել են անմարդկային դաժանություններ. վառարանի երկաթյան կրակխառնիչը շիկացրել են և նրանով ծեծել ամուսիններին, ապա աքցանով քաշել են ամուսինների եղունգները:
Փաստի առթիվ ոստիկանության քննչական գլխավոր վարչության Կոտայքի մարզի քննչական բաժնի քննիչ Արմեն Մարգարյանի կողմից հարուցվել է քրեական գործ` ՀՀ քրօր.-ի 175 հոդվածի 2-րդ մասի 1-ին, 2-րդ, 3-րդ, 4-րդ կետերով (ավազակային հարձակում) և 235 հոդվածի 1-ին մասի (ապօրինի զենք, զինամթերք կրելը և օգտագործելը) հատկանիշներով, նշանակվել են մի շարք փորձաքննություններ, տուժողներին տրվել է դատաբժշկի ուղեգիր:
Լուսանկարները և տեսանյութը` Գագիկ Շամշյանի
ՈՒՂԻՂ ԵԹԵՐ
Ամենադիտված 
Ձմերուկը դարձել է չորս հոգանոց ընտանիքի մահվան պատճառ
