Երեք երիտասարդներ ընկել են Հրազդան կիրճի ջրանցքը. երկուսին կարողացել են փրկել, մեկին` ոչ (ԼՐԱՑՎԱԾ՝ ՖՈՏՈ)
Գագիկ Շամշյանը հայտնում է
Այսօր` նոյեմբերի 21-ին, արտակարգ պատահար է տեղի ունեցել Երևանում: Ինչպես դեպքի վայրից ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, ժամը 17.20-ի սահմաններում Հրազդանի կիրճով անցնող ջրանցքում խեղդվելիս են եղել 3 երիտասարդներ:
Բարեբախտաբար, ջրանցքի այդ հատվածի հարևանությամբ անցնելիս են եղել մի քանի այլ երիտասարդներ, ովքեր նետվել են ջուրը` փրկելու երիտասարդներին:
Օգնության հասածները կարողացել են ջրանցքից հանել 18-ամյա Արուսյակ Խաչատրյանին և 17-ամյա Լևոն Սաֆարյանին, ովքեր տեղափոխվել են Պռոշյան փողոցում գտնվող շտապօգնության հիվանդանոց:
Երրորդ երիտասարդին` Արթուր Աղայանին (18-20 տարեկան), չի հաջողվել փրկել: Թեև օգնության հասած երիտասարդները նրան էլ են դուրս բերել ջրից, սակայն նա արդեն ջրախեղդ էր եղել:
Ականատեսները ֆոտոլրագրող Գագիկ Շամշյանին պատմել են, որ երիտասարդները ուզել են ջրանցքի մոտ լուսանկարվել, նրանցից մեկը սայթաքել է, մյուս երկուսը փորձել են պահել նրան, սակայն իրենք էլ նրա հետ ընկել են ջրանցքը:
Դեպքի վայր են ժամանել ոստիկանության Մալաթիա-Սեբաստիայի բաժնի աշխատակիցները` բաժնի պետի օպերատիվ աշխատանքների գծով տեղակալ Գարիկ Ղուկասյանի գլխավորությամբ:
Դեպքի վայր էին ժամանել նաև Արտակարգ իրավիճակների նախարարության Հայաստանի փրկարար ծառայության և 1-03 շտապբուժօգնության աշխատակիցները:
Քանի որ տարածքը պատկանում է Կենտրոն վարչական շրջանին, ոստիկանության Մալաթիա-Սեբաստիայի բաժնի օպերատիվ խումբը սպասում է, որ դեպքի վայր ժամանեն ոստիկանության Կենտրոնականի բաժնի աշխատակիցները:
Խեղդվող երիտասարդներին փրկածներից երկուսը Շիրակի մարզի բնակիչներ են` Կարեն և Սպարտակ անուններով, մյուսը Արգավանդի բնակիչ է` անունը Գևորգ: Երիտասարդները հրաժարվել են ֆոտոլրագրող Գագիկ Շամշյանին այլ մանրամասներ հայտնել` պատճառաբանելով, թե իրենք կատարել են իրենց քաղաքացիական պարտքը:
Արդեն դեպքի վայր են ժամանել նաև ոստիկանության Կենտրոնականի բաժնի աշխատակիցները` բաժնի պետի օպերատիվ աշխատանքների գծով տեղակալ Արթուր Հովհաննիսյանի գլխավորությամբ:
Լուսանկարները` Գագիկ Շամշյանի
ՈՒՂԻՂ ԵԹԵՐ
Ամենադիտված 
«Մարինան նույնպես չկարողացավ հաղթել այդ չարիքին». Իրինա Թովմասյանը ցավալի լուր է հայտնել
