Կնոջ պատմելով՝ ամուսինն իրեն հարվածել է, ինչն այնքան է վախեցրել իրեն, որ վաղաժամ ծննդաբերել է մահացած երեխայի (ՖՈՏՈ, ՏԵՍԱՆՅՈՒԹ)

Նոյեմբերի 22-ին արտակարգ դեպք է տեղի ունեցել Գեղարքունիքի մարզում:

Ինչպես Գեղարքունիքի մարզից ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, գիշերը' ժամը 03.00-ի սահմաններում, «Մարտունու ծննդատուն» ՓԲԸ-ից ոստիկանության Մարտունու բաժին հայտնել են, որ իրենց մոտ է տեղափոխվել Մարտունի քաղաքի բնակչուհի, 26-ամյա Աննա Ադիլխանյանը: Վերջինս ծննդատանը հայտարարել է, որ վայր ընկնելու հետևանքով ինքը վաղաժամ' 8 ամսականում, ծննդաբերել է աղջիկ երեխա, որը մահացած վիճակում գտնվում է իրենց տան զուգարանում:

Ծննդատուն է մեկնել ոստիկանության Մարտունու բաժնի օպերատիվ խումբը' բաժնի պետ Վահան Մարգարյանի գլխավորությամբ:

Արդեն ծննդատանը ոստիկաններին Ա.Ադիլխանյանը հայտարարել է, որ մի քանի օր առաջ' նոյեմբերի 20-ին, ժամը 17.00-ի սահմաններում, իր ամուսինը' 26-ամյա Նվեր Մարկոսյանը, կենցաղային հարցերի շուրջ վիճաբանել է իր հետ և վիճաբանության ժամանակ ձեռքով հարվածել է իր դեմքին:

Դրանից հետո ամուսինների միջև ոչ մի վիճաբանություն տեղի չի ունեցել, սակայն Աննա Ադիլխանյանի ենթադրությամբ, հնարավոր է, որ ամուսնու հարվածից իքնն այնքան է վախեցել, որ վաղաժամ ծննդաբերել է և կորցրել է երեխային:

Գալով տուն' ոստիկանները տան հատակին հայտնաբերել են մահացած նորածնի դին:

Փաստի առթիվ ոստիկանության քննչական գլխավոր վարչության Գեղարքունիքի մարզի քննչական բաժնի Մարտունու քննչական բաժանմունքի ավագ քննիչ Ակսել Մանուկյանի կողմից նշանակվել են մի շարք փորձաքննություններ, այդ թվում` դատաբժշկական:

Նմանատիպ հայտարարություն է տվել նաև աղջկա ամուսինը` Նվեր Մարկոսյանը:

Վերջինս ավագ քննիչ Ակսել Մանուկյանի կողմից ստորագրությամբ ազատ է արձակվել:

Մարտունիում հարևանները ֆոտոլրագրող Գագիկ Շամշյանին պատմել են, որ ամուսինները` Աննան և Նվերը, ունեն մեկ անչափահաս երեխա' Ռաֆայել անունով, և բնակվում են սոցիալապես բավականին ծանր պայմաններում. երկուսենյականոց բնակարանը չի ջեռուցվում:

Լուսանկարները և տեսանյութը՝ Գագիկ Շամշյանի