ՇՏԱՊ. Դիմակավորված ավազակային հարձակում Քանաքեռավանում. հանցագործը բռնություն է կիրառել անչափահաս աղջկա նկատմամբ (Թարմացված՝ Ֆոտոշարք, տեսանյութ)

Այսօր ավազակային հարձակում է տեղի ունեցել Կոտայքի մարզում:

Ինչպես քիչ առաջ դեպքի վայրից ԼՈՒՐԵՐ.com–ին տեղեկացրեց ֆոտոլրագրող Գագիկ Շամշյանը, անհայտ անձը դիմակավորված ժամը 19-ից 19:30 սահմաններում միայնակ մուտք է գործել Քանաքեռավան համայնքի 11 փողոցի թիվ 19 տուն: Այս մասին ֆոտոլրագրողի հետ զրույցում հայտնել են ավազակային հարձակման ենթարկված սեփական տան հարևանությամբ բնակվողները, ովքեր հրաժարվել են ներկայանալ: Հանցագործը բռնություն է կիրառել տանը գտնվող անչափահաս 17-ամյա աղջկա՝ Շաքեի նկատմամբ, այնուհետև, տանից հափշտակելով ոսկյա զարդեր և 10.000 դրամ, փախել է:

Հարևանները Գագիկ Շամշյանին հայտնել են նաև, որ հանցագործը բազմաթիվ հարվածներ է հասցրել աղջկա գլխին, մարմնի տարբեր հատվածներին, աղջկա աչքի տակ կապտուկներ են եղել: Այս պահին դեպքի վայրում են գտնվում Ոստիկանության ՔԳՎ Կոտայքի մարզի քննչական բաժնի քննիչները՝ քննչական բաժնի պետ Վալենտին Պապյանի և Նաիրիի քննչական բաժանմունքի պետ Մարատ Դուրյանի գլխավորությամբ:

Բացի քննչական խմբից, դեպքի վայր են ժամանել նաև Ոստիկանության Կոտայքի մարզային վարչության օպերատիվ խումբը՝ վարչության պետի տեղակալներ Կորյուն Հարությունյանի և Մանվել Վարդանյանի գլխավորությամբ:

Հարևանները պատմել են նաև, որ հանցագործը ոսկյա զարդերը հայտնաբերել է տիկնիկի մեջ, որտեղ տան անդամները պահում էին իրենց ընտանիքի ոսկեղենը:

ԼՈՒՍԱՆԿԱՐՆԵՐԸ՝ ԳԱԳԻԿ ՇԱՄՇՅԱՆԻ