3 ջիփ տեղափոխող բեռնատարը շրջվել է. Վրաստանի քաղաքացին տեղափոխվել է Իջևանի հիվանդանոց (Ֆոտոշարք, տեսանյութ)

Այսօր' նոյեմբերի 26-ին, ավտովթար է տեղի ունեցել Տավուշի մարզում:

Ինչպես դեպքի վայրից ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, այսօր' կեսօրին, Ազատամուտ-Ոսկեպար-Նոյեմբերյան միջպետական ավտոճանապարհի 16-րդ կմ-ի ոլորաններում բեռնատար «Սկանիա» մակնիշի LAD 565 վրացական համարանիշի ավտոմեքենան կողաշրջվել է, որի հետևանքով վարորդը մարմնական վնասվածքներով տեղափոխվել է Իջևանի հիվանդանոց:

Վարորդը Վրաստանի քաղաքացի, 60-ամյա Թամազ Նովևիլ Պաիկիձեն է, որը հիվանդանոց մեկնած ոստիկանության Իջևանի բաժնի քննչական բաժանմունքի քննիչին հայտարարել է, որ մեքենայի կցորդում կան երեք «Ջիպ» մոդելի ավտոմեքենաներ, որոնք պատկանում են «Տրանսալյանս Փոթի» ՍՊԸ-ին:

Դեպքի վայր են ժամանել ճանապարհային ոստիկանության 2-րդ սպայական գումարտակի 4-րդ վաշտի 2-րդ դասակի տեսուչները` դասակի հրամանատար Կորյուն Բոյաջյանի գլխավորությամբ:

Դեպքի վայրում քննչական աշխատանքները ղեկավարել է ոստիկանության Իջևանի բաժնի քննչական բաժանմունքի քննիչ Սևակ Բադիրյանը:

Լուսանկարները և տեսանյութը` Գագիկ Շամշյանի