Մասիսում չեն դադարում խոսակցությունները, որ մերկապարուհիներին իրականում զենքով ստիպողաբար պարեցրել է նախկին ոստիկանապետ Ալիկ Սարգսյանի մորաքրոջ որդին (ՖՈՏՈ)

Մասիսի քննչական բաժանմունքի քննիչը միջնորդել էր նշված դատարան, որպեսզի կասկածյալի նկատմամբ որպես խափանման միջոց ընտրվեր երկամսյա կալանքը: 

Արարատի մարզում չեն դադարում խոսակցություններն այն մասին, որ նոյեմբերի 18-ին «Էլիզա» գիշերային ակումբի տարածքում հնչած կրակոցները արձակել է ոչ միայն Արթուր Բիլբուլյանը, այլև ՀՀ պետական եկամուտների կոմիտեի Մասիսի տարածքային հարկային տեսչության օպերատիվ բաժնի պետ Արթուր Գալստյանը, ում ավտոմեքենան այդ օրը եղել է նշված վայրում:

Մասիսցիները նաև պատմել են, որ սակայն, չգիտես ինչու, հարուցված քրեական գործում որպես վկա է ներգրավվել Արթուր Գալստյանի վարորդը` Գրիգոր Հովհաննիսյանը, իսկ ոստիկանությունը կարողացել է վարպետորեն Արթուր Գալստյանին գործի միջից դուրս բերել, քանի որ նա ՀՀ նախկին ոստիկանապետ, ոստիկանության գեներալ-լեյտենանտ Ալիկ Սարգսյանի մորաքրոջ տղան է:

Ֆոտոլրագրող Գագիկ Շամշյանը հայտնում է, որ մասիսցիները հուսով են, որ ոստիկանները եթե ցանկանան, օբյեկտիվ քննություն կկատարեն: 

Ավելի վաղ ԼՈՒՐԵՐ.com-ին հայտնել էր ֆոտոլրագրող Գագիկ Շամշյանը, որ ոստիկանության Մասիսի բաժնում օպերատիվ տեղեկություններ են ստանում, որ նոյեմբերի 18-ին՝ գիշերը ժամը 03:00-ի սահմաններում, Արարատի մարզի Արտաշատ-Երևան ավտոճանապարհի վրա գտնվող «Էլիզա» գիշերային ակումբի տարածքում կրակոցներ են հնչել:

Ոստիկանության Մասիսի բաժնի քրեական հետախուզության բաժանմունքի աշխատակիցները 2 օր առաջ Արտաշատ քաղաքից նշված արարքը կատարելու կասկածանքով բերման են ենթարկում 39-ամյա Արտաշատի Աթարբեկյան 11 տան բնակիչ, «Բիլբուլ» մականվամբ Արթուր Բիլբուլյանին:

Պարզվում է, որ նա նոյեմբերի 18-ին իր ընկերոջ՝ Արտաշատի բնակիչ 33-ամյա Գրիգոր Հովհաննիսյանի հետ գնացել են «Էլիզա» գիշերային ակումբ, որտեղ իրենց մոտ եղած գազային ատրճանակները ցուցադրաբար դրել են սեղանին և այդ ժամանակ պարուհիներին ստիպել պարել:

Արդեն կեսգիշերին նրանք պարուհիներից մեկին կիսամերկ վիճակում դուրս են բերել ակումբից և ստիպել, որպեսզի մայրուղում նա պարի:

Այդ ընթացքում օդ են կրակել:

Արտաշատում բնակիչներին ֆոտոլրագրող Գագիկ Շամշյանին հայտնել են, որ Արթուր Բիլբուլյանը աշխատում է «Արթուր Բիլբուլյան» ԱՁ-ում՝ որպես տնօրեն և զբաղվում է հացի արտադրությամբ, Արտաշատում էլ ունի խմորեղենի խանութ և սննդի արագ սպառման կետ:

Իսկ Գրիգոր Հովհաննիսյանը հանդիսանում է ՀՀ Պետական եկամուտների կոմիտեի Մասիսի տարածքային հարկային տեսչության օպերատիվ բաժնի պետ Արթուր Գալստյանի վարորդը:

Նրանք գիշերային ակումբ գնացել էին Ա. Գալստյանի ծառայողական «ՎԱԶ 2107» մակնիշի 080 ԼԼ 03 համարանիշի ավտոմեքենայով:

Երբ Մասիսի ոստիկանները «Բիլբուլ»-ին բերման են ենթարկել, նրա անձնական օգտագործման «Մերսեդես» մակնիշի 11 ՍՕ 331 համարանիշի ավտոմեքենայում՝ փոխանցման տուփի մոտ հայտնաբերել են գազային ատրճանակը:

«Մերսեդեսը»-ը տեղափոխվել է ոստիկանության Մասիսի բաժնի տուգանային հրապարակ, իսկ առգրավված գազային ատրճանակներն ու դեպքի վայրում հայտնաբերված պարկուճները ուղարկվել են ոստիկանության փորձաքրեագիտական վարչություն:

Նշանակվել են մի շարք փորձաքննություններ: Ֆոտոլրագրող Գագիկ Շամշյանը հայտնեց, որ այս տարվա հոկտեմբերին Աբովյան քաղաքում սպանվել էր նշված գիշերային ակումբի տնօրենը:

Լուսանկարները` Գագիկ Շամշյանի։