Դիմակավորված կողոպտիչը «Հայփոստից» կողոպտել է խոշոր գումար (ֆոտոշարք)

 Այսօր՝ նոյեմբերի 30-ին կողոպուտ է տեղի ունեցել Երևանում:

Ինչպես դեպքի վայրից ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, ժամը 19.30-ի սահմաններում դիմակավորված անհայտ անձը մուտք է գործել Նոր Նորք վարչական շրջան Դավիթ Մալյան 4 հասցեում գործող «Հայփոստի» թիվ 0096 փոստային բաժանմունք եւ այնտեղ գտնվող աշխատակցուհու ձեռքից հափշտակել գումար և դիմել փախուստի:

Այս պահին արդեն դեպքի վայր են ժամանել ոստիկանության Նոր Նորքի բաժնի օպերատիվ խումբը' Նոր Նորքի ոստիկանապետ Գրիշա Ամիրխանյանի գլխավորությամբ:

Արդեն ժամանել են ոստիկանության քննչական գլխավոր վարչության Նոր Նորքի քննչական բաժնի քննիչները' քննչական բաժնի պետ Մհեր Վարդանյանի գլխավորությամբ:

Հայտնի է դարձել, որ դիմակավորված կողոպտիչի գողացած գումարը կազմում է 1 միլիոն 340 հազար ՀՀ դրամ:

Ֆոտոլրագրող Գագիկ Շամշյանը հայտնում է, որ դեպքի վայրում հավաքվածներն իրեն պատմել են, որ նշված տարածքը եղել է խանութ, իսկ հիմա «Հայփոստ»-ը գործնեություն է ծավալում այդ տարածքում վարձակալական հիմունքներով: Ի դեպ, տարածքում բացակայում են անվտանգության պահպանման բոլոր կանոնները, ինչը հնարավորություն է տվել կողոպտչին անարգել կատարել իր գործը: Շրջակա տարածքի բնակիչները դժգոհում էին, որ «եթե հսկողություն իրականացնեին, ապա գողը անարգել չէր մտնի»:

Ժամանել էր նաեւ նախկին ոստիկան Սամվել Ռշտունին, ով ըստ հավաքվածների, «Հայփոստ» ընկերության անվտանգության ծառայության պետն է: Նրան փոխանակ մտահոգեր իր պատասխանատվության տակ գտնվող տարածքում տեղի ունեցածը, ֆոտոլրագրողին զգուշացնում էր. «Պատրաստվեք, որ դեկտեմբերին դատվելու եք»: Նա նկատի ունի այն հանգամանքը, որ «Առավոտ», «Չորրորդ ինքնիշխանություն» օրաթերթերում եւ «Արմենիա» եւ Երկիր մեդիա հեռուստաընկերություններով լրատվություն է գնացել, որ նրա ազգականը դատարանի կողմից կալանավորվել է սպանություններ կատարելու համար:

Կատարված կողոպուտի փաստով ոստիկանության քննչական գլխավոր վարչության Նոր Նորքի քննչական բաժնում հարուցվել է քրեական գործ ՀՀ քրօրի 176 հոդվածի 2-րդ մասի 2-րդ կետի հատկանիշներով (կողոպուտ խոշոր չափի):

Լուսանկարները' Գագիկ Շամշյանի:

{gallery}shamshyan/haypost{/gallery}