ՀՔԾ քննիչ Արմեն Նադիրյանը փրկվել է ամրագոտու և անվտանգության բարձիկների շնորհիվ. այսօր նա վիրահատվելու է (ՖՈՏՈ, ՏԵՍԱՆՅՈՒԹ)

Ժամը 21.00-ի սահմաններում «Նիսսան Պայտֆայնդեր» մակնիշի 067 ՏՕ 01 համարանիշի ավտոմեքենայի վարորդը Սևան-Երևան ավտոճանապարհի Հրազդանի հատվածում դուրս էր եկել ճանապարհի երթևեկելի գոտուց և շրջվել ձորը: 

Դեպքի վայր էին ժամանել Ճանապարհային ոստիկանության 2-րդ սպայական գումարտակի 3-րդ վաշտի աշխատակիցները` վաշտի հրամանատար Արսեն Գրիգորյանի գլխավորությամբ:

Ժամանել էին նաև ոստիկանության Կոտայքի մարզային վարչության օպերատիվ խումբը` վարչության պետի տեղակալ Կորյուն Հարությունյանի գլխավորությամբ:

Դեպքի վայրում ֆոտոլրագրող Գագիկ Շամշյանին հայտնի էր դարձել, որ նշված ավտոմեքենան վարել էր Հայաստանի հատուկ քննչական ծառայության քննիչ Արմեն Նադիրյանը, ով ավելի ուշ` վթարից հետո, բուժզննման նպատակով տեղափոխվել էր Սուրբ Գրիգոր Լուսավորիչ բժշկական կենտրոն:

Քննիչը մարզից վերադառնալիս է եղել Երևան և վթարի հիմնական պատճառ է եղել այն, որ ճանապարհը պատված է եղել մերկասառույցով և ըստ դեպքի վայրում հավաքվածների` ավտոմեքենան մոտ 40 մետր սահել է: Քննիչը փրկվել է ամրագոտու և անվտանգության փարձիկների շնորհիվ:

Ֆոտոլրագրողը հայտնում է ԼՈՒՐԵՐ.com-ին, որ այսօր` նոյեմբերի 30-ին, քննիչ Արմեն Նադիրյանը վիրահատման է ենթարկվելու:

Լուսանկարները և տեսանյութը` Գագիկ Շամշյանի