ՃՈ-ն և շտապօգնությունն ուժեղացված հերթապահություն են իրականացնում Երևան-Սևան ավտոճանապարհին

Այսօր՝ օգոստոսի 4-ին, ֆոտոլրագրող Գագիկ Շամշյանն այցելել է Սևան և ճանապարհին արձանագրել Ճանապարհային ոստիկանության շտապօգնության բրիգադների ավտոմեքենաներ:

ՀՀ ոստիկանության պետ, գեներալ-լեյտենանտ Վլադիմիր Գասպարյանի և ՀՀ առողջապահության նախարար Դերենիկ Դումանյանի համատեղ նախաձեռնությամբ, 2 գերատեսչությունների՝ ճանապարհային ոստիկանության և շտապօգնության ծառայության աշխատակիցները հատկապես հանգստյան օրերին ուժեղացված հերթապահություն են իրականացնում նշված ավտոճանապարհի ողջ երկարությամբ:

Հերթապահող բժիշկները ֆոտոլրագրող Գագիկ Շամշյանին ասել են, որ իրենք երանի են տալիս, որ իրենց կարիքը ոչ ոք չունենա, բայց պետք եղած դեպքում իրենք վայրկյանների ընթացքում օգնության կհասնեն:

Սևան մեկնող որոշ քաղաքացիներ էլ Գագիկ Շամշյանին ասել են, որ թող բոլորն էլ կարոտ մնան նման օգնության, սակայն միևնույն ժամանակ չափազանց բարձր են գնահատել այս նոր ու աննախադեպ նախաձեռնությունը:

Նշված տարածքում ճանապարհային ոստիկանության աշխատանքների կատարումը և հսկողությունը դրված են Ճանապարհային ոստիկանության 2-րդ սպայական գումարտակի հրամանատար, փոխգնդապետ Արսեն Արշակյանի վրա:

Shamshyan.com