Ավտովթար Երևանում. «Մերսեդես»-ի վարորդը դիմել է փախուստի, կա 4 վիրավոր, որոնցից մեկը Խաչատուր Սուքիասյանի ազգականն է (ՖՈՏՈ)
Գագիկ Շամշյանը հայտնում է
Այսօր` դեկտեմբերի 1-ին, ավտովթար է տեղի ունեցել Երևանում:
Ինչպես դեպքի վայրից ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, ժամը 01.00-ի սահմաններում Երևանի Հերացի փողոցից Խանջյան փողոց տանող ստորգետնյա ճանապարհին իրար են բախվել 58-ամյա Ռազմիկ Սուքիասյանի կողմից վարած «ԶԱԶՍԵՆՍ» մակնիշի Տ 6954 համարանիշի և «Մերսեդես Բենս» մակնիշի 81 ՍՏ 111 համարանիշի ավտոմեքենաները:
Բախման հետևանքով «ԶԱԶՍԵՆՍ»-ի վարորդը և ուղևորներ` «Լոյալ Ինտենս» ՍՊԸ-ի տնօրեն, Վանաձորի բնակիչ, 28-ամյա Կարեն Մազմանյանը, ՀՀ կառավարությանն առընթեր Պետական եկամուտների կոմիտեի օպերատիվ հետախուզության վարչության ավագ օպերլիազոր, Վանաձորի բնակիչ, 25-ամյա Արթուր Առուստամյանը և «Վ և Լ» ՍՊԸ-ի տնօրեն, Վանաձորի բնակիչ, 29-ամյա Վահե Նաջարյանը մարմնական վնասվածքներով տեղափոխվել են Սուրբ Գրիգոր Լուսավորիչ բժշկական կենտրոն:
«Մերսեդես Բենս»-ի վարորդը վթարի վայրից դիմել է փախուստի` մեքենան թողնելով դեպքի վայրում:
Դեպքի վայրում քննչական աշխատանքները ղեկավարել է ոստիկանության քննչական գլխավոր վարչության Երևանի քննչական վարչության ճանապարհատրանսպորտային հանցագործությունների քննության բաժնի ավագ քննիչ Արտաշ Վանյանը:
Նրա հանձնարարականով, ավտոմեքենաները տեղափոխվել են Երևանի ՃՈ տուգանային հրապարակ:
Քննչական բաժինը ձեռնարկում է օպերատիվ-քննչական միջոցառումներ` հայտնաբերելու դեպքի վայրից փախուստի դիմած «Մերսեդես Բենս»-ի վարորդին:
Դեպքի վայրում հավաքվածները ֆոտոլրագրողին հայտնել են, որ Ռազմիկ Սուքիասյանը ԱԺ նախկին պատգամավոր, «ՍԻԼ» կոնցեռնի հիմնադիր Խաչատուր Սուքիասյանի հորեղբոր որդին է:
Լուսանկարները՝ Գագիկ Շամշյանի
ՈՒՂԻՂ ԵԹԵՐ
Ամենադիտված 
Ո՞րն է սիրված արտիստ Արտաշես Ալեքսանյանի մահվան պատճառը. հայտնի են մանրամասներ
