3 հոգու մահվան պատճառ դարձած վարորդը կալանավորվեց (ֆոտո, տեսանյութ)

Դատարանի նախագահ Սուրեն Մնոյանը, խորհրդակցական սենյակից վերադառնալով, բավարարեց միջնորդությունը, և Արարատ Մուրադյանը տեղափոխվեց Նուբարաշեն ՔԿՀ: Հիշեցնենք, որ նոյեմբերի 30-ին ավտովթար-վրաերթ էր տեղի ունեցել Արագածոտնի մարզում:

Ինչպես դեպքի վայրից ԼՈՒՐԵՐ.com-ին հայտնել էր ֆոտոլրագրող Գագիկ Շամշյանը, ժամը 23.45-ի սահմաններում Արագածոտնի մարզի Սասունիկ գյուղի բնակիչ, 38-ամյա Արարատ Մուրադյանը, վարելով «ՎԱԶ 2107» մակնիշի 21 ՕՕ 984 համարանիշի ավտոմեքենան, Աշտարակ-Էջմիածին ավտոճանապարհի 2-րդ կմ-ում բախվել էր ճամփեզրին կայանված «ՎԱԶ 2107» մակնիշի 11 ԼԼ 074 համարանիշի ավտոմեքենային: 

 Բախումից հետո Արարատ Մուրադյանը վրաերթի էր ենթարկել «ՎԱԶ 2107» մակնիշի 11 ԼԼ 074 համարանիշի ավտոմեքենայի մոտ կանգնած, Գիտավան թաղամասի բնակիչ, 21-ամյա Արամ Սիմոնյանին, Սևան քաղաքի բնակիչ, 20-ամյա Գագիկ Հովսեփյանին, 27-ամյա Հարություն Միրզախանյանին և Կոտայքի մարզի Մրգաշեն գյուղի բնակիչ, 31-ամյա Վահան Սահակյանին:

 Վրաերթի հետևանքով Ա.Սիմոնյանն ու Վ.Սահակյանը տեղում մահացել էին, իսկ Գ.Հովսեփյանն ու Հ.Միրզախանյանը մարմնական վնասվածքներով տեղափոխվել էին Աշտարակի հիվանդանոց:

Աշտարակի հիվանդանոցում Հ.Միրզախանյանը լուսաբացին մահացել էր: Դեպքի վայր էին ժամանել ոստիկանության քննչական գլխավոր վարչության Արագածոտնի քննչական բաժնի քննիչները` քննչական բաժնի պետ Ալբերտ Երիցյանի գլխավորությամբ: 

 Նույն բաժնի քննիչ Կոստանդյանի կողմից հարուցվել էր քրեական գործ` ՀՀ քրօր.-ի 242 հոդվածի 3-րդ մասի հատկանիշներով: Ավտոմեքենաները տեղափոխվել են ոստիկանության Աշտարակի բաժնի տուգանային հրապարակ: 

 Լուսանկարները և տեսանյութը` Գագիկ Շամշյանի