ԱՄՆ դեսպանատունը նվիրատվություն է կատարել ՀՀ ոստիկանությանը (ֆոտոռեպորտաժ, տեսանյութ)

Այսօր՝ դեկտեմբերի 2-ին, ՀՀ-ում ԱՄՆ դեսպանատունը սարքավորումներ է տրամադրել ՀՀ ոստիկանությանը:

Ինչպես ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, այսօր ՀՀ ոստիկանության պետ, գեներալ-լեյտենանտ Վլադիմիր Գասպարյանն ընդունեց ՀՀ-ում ԱՄՆ դեսպան Ջոն Հեֆերնին։

Հանդիպումից հետո դեսպանը ԱՄՆ կառավարության կողմից նվիրատվության կարգով 150.000 դոլար արժողությամբ գրասենյակային և համակարգչային նոր սարքավորումներ հանձնեց ՀՀ ոստիկանությանը։ Սարքավորումներն օգտագործվելու են ոստիկանության ԿՀԴՊ գլխավոր վարչության կիբերհանցավորության և թմրամիջոցների դեմ պայքարի ստորաբաժանումների կողմից։

ԱՄՆ պետքարտուղարության թմրամիջոցների դեմ պայքարի և իրավապահ համագործակցության բյուրոյի ֆինանսավորմամբ տրամադրված սարքավորումները ներառում են գրասենյակային և դյուրակիր համակարգիչներ, տպիչներ, պատճենահան սարքեր, պրոյեկտորներ և այլն։

Սարքավորումների տրամադրմամբ ակնկալվում է հզորացնել հանցավորության դեմ պայքարող երկու բաժինների օպերատիվ և վարչական կարողություններն ու արդիականացնել ՀՀ ոստիկանության տեխնիկական հնարավորությունները։

Նվիրաբերությունը ՀՀ ոստիկանությանը կատարվում է կառավարության կողմից իրականացվող առավել ընդգրկուն օժանդակության ծրագրի շրջանակում, որի նպատակն է աջակցել Հայաստանի իրավապահ կառույցների կարողությունների մեծացմանը հանցավորության դեմ պայքարում ու դատաիրավական գործընթացների ապահովման բնագավառում։

Նախկինում ՀՀ ոստիկանությանը ցուցաբերված օժանդակությունն ուղղվել է մարդկանց թրաֆիքինգի դեմ պայքարի, անօրինական միգրացիայի դեմ պայքարի ստորաբաժանումներին, ինչպես և ՀՀ ոստիկանության ակադեմիային և ուսումնական կենտրոնին։

ԱՄՆ կառավարության աջակցությունն՝ ուղղված Հայաստանի իրավապահ ու քրեադատավարական ոլորտին, տարեկան կազմում է մոտ 3 միլիոն ԱՄՆ դոլար։

Նվիրատվությանը, որը տեղի ունեցավ ԿՀԴՊ գլխավոր վարչության բակում, ներկա էին ԿՀԴՊ գլխավոր վարչության պետ Գագիկ Ավետիսյանը, ոստիկանության շտաբի պետ Վարդան Եղիազարյանը և ԿՀԴՊ գլխավոր վարչության 4-րդ վարչության պետ Լևոն Խաչատրյանը:

Ֆոտոռեպորտաժը և տեսանյութը' Գագիկ Շամշյանի

{gallery}shamshyan/usapresent{/gallery}