Տեղի է ունեցել հերթական կողոպուտը «Հայփոստ»-ից. հափշտակվել է 27 միլիոն 117 հազար դրամ (ԼՐԱՑՎԱԾ` ՖՈՏՈ, ՏԵՍԱՆՅՈՒԹ)

Գագիկ Շամշյանը հայտնում է 3 Դեկտեմբեր, 2011 7:29

Այսօր` դեկտեմբերի 3-ի առավոտյան, կողոպուտ է տեղի ունեցել Երևանում: Ինչպես դեպքի վայրից ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, ժամը 08.00-ի սահմաններում Արաբկիր վարչական շրջանում` Շիրվանզադե փողոցի թիվ 2 շենքում գտնվող «Հայփաստի» 0014 փոստային բաժանմունք է մտել մի հոգի և դանակի սպառնալիքով բաժանմունքի տնօրենի` Արմինե Աղգաշյանի ձեռքից հափշտակել խոշոր գումար:

Արդեն դեպքի վայր են ժամանել ոստիկանության Երևան քաղաքի վարչության օպերատիվ խումբը` Երևանի վարչության քրեական հետախուզության բաժնի պետ Արտակ Կարապետյանի գլխավորությամբ:

Դեպքի վայրում են նաև ոստիկանության Արաբկիր վարչական շրջանի օպերատիվ-քննչական խումբը` Արաբկիրի ոստիկանապետ Արթուր Մեհրաբյանի գլխավորությամբ:

«Հայփոստի» աշխատակիցները ֆոտոլրագրող Գագիկ Շամշյանին պատմել են, որ երբ առավոտյան իրենք եկել են աշխատանքի, ինկասացիայի աշխատակիցները մտել են ներս, որից հետո դանակով զինված հանցագործը ներխուժել է ներս և դանակի սպառնալիքով տնօրենուհու ձեռքից հափշտակել գումարը, որը եղել է 27 միլիոն 117 հազար դրամ:

«Հայփոստի» աշխատակիցները նաև պատմել են, որ այդ գումարը նախատեսված է եղել կենսաթոշակների և այլ սոցիալական վճարումների համար:

Հիշեցնենք, որ օրեր առաջ ավազակային հարձակում էր տեղի ունեցել նաև «Հայփոստի» Նոր Նորքում գտնվող բաժանմունքի վրա:

Ֆոտոլրագրող Գագիկ Շամշյանը հայտնում է, որ եթե Նոր Նորքի բաժանմունքում տիրում էր բարձիթողի վիճակ, ապա այսօր կողոպտված բաժանմունքում իրավիճակն այլ է. ներսում կային տեսանկարահանող սարքավորումներ, որոնք նկարահանել են կողոպուտը:

Ոստիկանությունը ձեռնարկում է օպերատիվ-քննչական գործողություններ` ճշտելու կողոպուտն իրագործած անձի ինքնությունը և հայտնաբերելու նրան:

Այս պահին արդեն վերականգնվել է «Հայփոստի» բաժանմունքի բնականոն աշխատանքը, սակայն քաղաքացիների մուտքը բաժանմունքի տարածք արգելվում է, քանի որ ոստիկանության օպերատիվ-քննչական խումբը նշված հատվածում քննչական գործողություններ է կատարում:

Քիչ առաջ ոստիկանությունը «Հայփոստի» նշված բաժանմունքից առգրավեց և տարավ կողոպուտի տեսաձայնագրությունը:

Ֆոտոլրագրող Գագիկ Շամշյանը հայտնում է նաև, որ փոստային բաժանմունքի մոտ հավաքվել են մեծ թվով թոշակառուներ, ովքեր եկել են իրենց թոշակը ստանալու, սակայն նրանց, հասկանալի պատճառներով, ներս չեն թողնում:

Փաստի առթիվ ոստիկանության քննչական գլխավոր վարչության Արաբկիրի քննչական բաժնում հարուցվել է քրեական գործ` ՀՀ քրօր.-ի 176 հոդվածի 2-րդ մասի 2-րդ կետի (կողոպուտ` խոշոր չափի) հատկանիշներով:

Լուսանկարները և տեսանյութը` Գագիկ Շամշյանի

{gallery}shamshyan/razboy-haypost{/gallery}