Օնիկ Գասպարյանի եփած ճաշն է, թող ինքն էլ գա, պատասխան տա էսքան ծնողներին. ՊՆ-ի դիմաց կրկին անհետ կորածների հարազատներն են (տեսանյութ)

Անհետ կորածների հարազատները կրկին ՊՆ-ի դիմաց են:  Նրանք պահանջում են  հանդիպում ՊՆ նախարար Վաղարշակ Հարությունյանի և  Հայաստանի զինված ուժերի գլխավոր շտաբի պետ Օնիկ Գասպարյանի հետ:  

«Որդուս հետ վերջին անգամ խոսել եմ հոկտեմբերի 17-ին, եղել է սպա, ծառայությունը անցկացրել է Ջաբրայիլում: «Կարմիր Խաչը» ասում ա, լուսանկար, տեսանյութ ցույց տվեք, որ ձեր որդին գերի է, բայց իմ երեխան չունի նման ո՛չ լուսանկար, ո՛չ տեսանյութ, հիմա պետք ա տենց իմ երեխան մնա օդում կախված»,- այս մասին լրագրողի հետ զրույցում ասաց անհետ կորածի մայրը, իսկ մեկ այլ ծնողն էլ նրա խոսքին հավելեց. «Ալիևի հետ լուսնկար ա պետք երևի»:

Վերջինս նշեց, որ կառավարությունը ասել է, որ 15 օր էլ սպասեն, մինչև գան ԴՆԿ-ի պատասխանները.  «Կառավարությունը բան չունի ասելու, ինչ ասի: Հիմա մենք եկել ենք, ուզում են Օնիկ Գասպարյանին տենանք, որովհետև իր եփած ճաշն է, թող ինքն էլ գա պատասխան տա էսքան ծնողներին»,- ասաց անհետ կորածի մայրը:

Հիշեցնենք, որ անհետ կորածների հարազատները վերջին անգամ ՊՆ-ի դիմաց հավաքվել էին շաբաթ օրը և կրկին պահանջում էին հանդիպում Վաղարշակ Հարությունյանի հետ, որը այդպես էլ չկայացավ: 

Տեսանյութը՝ 168. am-ի