«Նոր մարտահրավերներ՝ նոր լուծումներ»

«Երբեք մի ասեք՝ մեզ մոտ չի ստացվել, կամ մեզ մոտ մի օր կստացվի, որովհետև մի օրն այսօր է, որը երբեք էլ չի կրկնվի, մենք պետք է մեր մեջ ուժ գտնենք և նորից սկսենք՝ ունենալով հաղթանակի հստակ նպատակ և ազգային համախմբվածություն…»:

Զինաիդա Սնխչյան

(Պետական կառավարման ակադեմիայի ուսանողական խորհրդի նախագահ)

Պետական կառավարման ակադեմիայի ուսանողական խորհրդի կողմից իրականցվող ծրագրերի պատմության շարքը համալրվեց ևս մեկով:  2021թ.-ի փետրվարի 6-ից 7-ը քաղաք Ծաղկաձորում տեղի ունեցավ «Նոր մարտահրավերներ՝ նոր լուծումներ» խորագիրը կրող պանելային քննարկումը: Այս խորագրի ընտրությունը պատահական չէր: Քննարկումը նվիրված էր ներկա առանցքային հարցերից մեկին՝ 2020թ.-ի նոյեմբերի 9-ին ստորագրված համաձայնագրին, որն անկյունաքարային նշանակություն ունեցավ մեր երկրի, ժողովրդի համար: Քննարկմանը մասնակցում էին մրցութային փուլը հաղթահարած շուրջ չորս տասնյակ ուսանողներ: Հրավիրյալ բանախոսներն էին քաղաքագետ, վերլուծաբան Սուրեն Պետրոսյանը և տնտեսագիտության թեկնածու, դոցենտ Վիլեն Խաչատրյանը:

Բացման խոսքով հանդես եկավ ՀՀ ՊԿԱ ՈՒԽ նախագահ Զինաիդա Սնխչյանը: Վերջինս հիմնավորեց այս միջոցառման արդիականությունը, կրթության տեղն ու դերը: «Մեր սերունդը, մենք պետք է կարողանանք համաշխարհային օրակարգի և գլոբալ երկխոսության մաս կազմել, ներգրավվել ապագային վերաբերող քննարկումներին: Իսկ ապագան փոխվում է…: Այն արդեն փոխվել է և չի լինի այնպիսին, ինչպիսին պատկերացնում էինք բոլորովին վերջերս: Հետևաբար վաղվա մեր որոշումները մեծապես կախված են լինելու այսօրվա մեր գիտելիքի պաշարից և առողջ դատողությունից: Պետք է կրթվենք, դառնանք մրցունակ և ամենակարևորը պահպանենք մեր ինքնությունը»,-ասաց Զինաիդա Սնխչյանը:

Այնուհետև հայտարարվեց լռության րոպե ի հիշատակ արցախյան պատերազմում ընկած արծվաբույն լեռների խիզախ, հերոս հայորդիներին:

Բանախոս քաղաքագետ-վերլուծաբան Սուրեն Պետրոսյանը, վերլուծելով ստեղծված իրավիճակի քաղաքական ասպեկտը ընդգծեց, որ Էլիտան է ավանգարդը։ Նա նշեց, որ Էլիտան ազգի ֆիլտրման գաղափարախոսությունն է և,  եթե թշնամուդ նպատակը ավելի մեծ է քան քոնը, ուրեմն քո գույքը իրենն է: Ուստի պետք չէ խոսել, թե թշնամին ինչ է անում, պետք դա իմանալ ու մտածել դրանից ավելին։ «ՀՀ-ն վերածվում է տարանցիկ գոտու և մենք անգամ չենք դառնում տնտեսական սուբյեկտ։ Չկա կոնսենսուս բանակի և Արցախի հանդեպ, կա միայն ինքնության բաղադրիչի մերժում։ Այո՛, աշխարհը համոզում է, որ իրական է այն, ինչ մենք տեսնում ենք»,-ասաց բանախոսը:

Տնտեսագիտության թեկնածու, դոցենտ Վիլեն Խաչատրյանը ներկայացրեց տնտեսական ոլորտում առկա մարտահրավերները,, դրանց արդյունավետ պատասխանելու ուղիները:

 Հետաքրքիր նախաձեռնություն է բոլոր առումներով, և ինչպես նշեցին բանախոսները, օրինակելի այս նախաձեռնությունը օգտաշահ իրողություն է։

Ծավալվեց մտքերի աշխույժ փոխանակություն, արվեցին ուշագրավ դիտողություններ: Քննարկումն անցավ բավականին բուռն, հագեցած: Քննարկման ավարտին ամփոփվեցին արդյունքները և ՈւԽ նախագահ Զինաիդա Սնխչյանի կողմից հանձնվեց հավաստագրեր: