Ինքնասպանություն է տեղի ունեցել Երևանում. այժմ փրկարարները հանում են մահացածի դին (ԼՐԱՑՎԱԾ՝ ՖՈՏՈ, ՏԵՍԱՆՅՈՒԹ)

Այսօր՝ դեկտեմբերի 11-ին, ինքնասպանություն է տեղի ունեցել Երևանում:

Ինչպես դեպքի վայրից ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, ժամը 11.30-ի սահմաններում մի տղամարդ իրեն ցած է նետել Կիևյան կամրջից և ընկել է գետի մեջ:

Այս պահին դեպքի վայր է ժամանել Արտակարգ իրավիճակների նախարարության Հայաստանի փրկարար ծառայության օպերատիվ խումբը, ինչպես նաև ոստիկանության Մալաթիա-Սեբաստիայի բաժնի օպերատիվ-քննչական խումբը:

Դեպքի վայրում էին նաև ոստիկանության Մաշտոցի բաժնի աշխատակիցները, սակայն նրանք, չգիտես ինչու, 2-3 րոպե հետո հեռացան` չփորձելով անգամ պարզել կամ ճշտել, թե այդ տարածքը իրե՞նց իրավասության տակ է, թե՞ ոչ:

Շուտով դեպքի վայր կժամանեն նաև փրկարարները, որպեսզի մահացածի դին դուրս բերեն ջրից:

Դեպքի վայր պետք է ժամանի նաև դատական բժիշկը:

Արդեն դեպքի վայր է ժամանել ոստիկանության քննչական գլխավոր վարչության Երևանի քննչական վարչության Մալաթիայի քննչական բաժնի քննիչները հատկապես կարևորագույն գործերով ավագ քննիչ Աշոտ Օհանյանի գլխավորությամբ:

Ֆոտոլրագրող Գագիկ Շամշյանը քիչ առաջ հայտնեց, որ ի վերջո, պարզվել է, որ տարածքը ոստիկանության Մաշտոցի բաժնի իրավասության ներքո է, և դեպքի վայր են վերադարձել Մաշտոցի բաժնի աշխատակիցները:

Փաստի առթիվ Մաշտոցի քննչական բաժնում նյութեր են նախապատրաստվում:

Այժմ իրավապահները ձեռնարկում են օպերատիվ-քննչական միջոցառումներ` պարզելու համար ինքնասպան եղած տղամարդու ինքնությունը:

Լուսանկարները և տեսանյութը` Գագիկ Շամշյանի

{gallery}shamshyan/Inqnaspan-2{/gallery}