Հրդեհ Երևանում` հրշեջները հայտնաբերել են տղամարդու դիակ

Ինչպես ԼՈՒՐԵՐ.com-ին հայտնեց ֆոտոլրագրող Գագիկ Շամշյանը՝ դեկտեմբերի 11-ին՝ ժամը 22:22-ին, ԱԻՆ Հայաստանի փրկարար ծառայություն ահազանգ է ստացվել, որ Մոսկովյան 28 շենքի 5-րդ հարկում ծխապատ գոտի կա:

Անմիջապես դեպքի վայր է մեկնել 2 մարտական հաշվարկ և 1 ավտոսանդուղք: 22:26-ին հրշեջ փրկարարները եղել են դեպքի վայրում: Ավտոսանդուղքի օգնությամբ հրշեջները պատշգամբից մուտք են գործել Մոսկովյան 28 շենքի 119 բնակարան: Ժամը 22:44-ին հրդեհն արդեն մեկուսացված է եղել և մարվել է՝ 22:46-ին:

Ինչպես հայտնեց ֆոտոլրագրողը, հրշեջները մուտք գործելով բնակարան՝ հայտնաբերել են անկողնու մեջ ծխախեղդ եղած 60-65 տարեկան տղամարդու դիակ:

Նախնական վարկածով ծխացել է անկողինը, ամենայն հավանականությամբ տղամարդը դրանից էլ մահացել է. նշենք, որ անկողնու մոտ եղել է էլ. սալիկ, ինչից և հնարավոր է բռնկվել է հրդեհը: Հրդեհի վայր են ժամանել նաև ոստիկանության Կենտրոնականի բաժնի օպերատիվ քննչական խումբը: Քննչական բաժնում նյութեր են նախապատրաստվում: