Ողբերգական ավտովթար Գեղարքունիքի մարզում. Վազ 2106-ի վարորդը և 3 ուղևորները մահացել են (Թարմացված՝ Ֆոտո, Տեսանյութ)

Այսօր` դեկտեմբերի 12-ին, խոշոր ավտովթար է տեղի ունեցել Գեղարքունիքի մարզում:

Ինչպես ԼՈՒՐԵՐ.com-ին դեպքի վայրից հայտնեց ֆոտոլրագրող Գագիկ Շամշյանը` ժամը 19:00-ի սահմաններում Վարդենիս-Ճամբարակ ավտոճանապարհի 25-րդ կիլոմետրի հատվածում,  Վարդենիս քաղաքից դեպի Ճամբարակ տանող ուղեմասում, 1961 թ. ծնված Քաջիկ Խաչատրյանը, վարելով Գազ-31029 մակնիշի 35 ԼՏ 710 համարանիշի ավտոմեքենան, բախվել է 1988 թ. ծնված, Գեղարքունիքի մարզի Փամբակ գյուղի բնակիչ Մհեր Դաշյանի կողմից վարած Վազ 21013 մակնիշի 35 ԼԼ 307 համարանիշի ավտոմեքենային:

Բախման հետևանքով վարորդ Մհեր Դաշյանը, և ավտոմեքենայի ուղևորներ 1989 ծնված Արթուր Դաշյանը, Սուսաննա Ղուկասյանն ու Անդրանիկ Վանոյանը մահացել են: Իսկ Գազ-31029-ի վարորդ Քաջիկ Խաչատրյանը մարմնական վնասվածքներով տեղափոխվել է Վարդենիսի կայազորային զինվորական հոսպիտալ:

Դեպքի վայր են ժամանել ՃՈ 2-րդ սպայական գումարտակի աշխատակիցները, 2-րդ սպայական գումարտակի հրամանատար Արսեն Արշակյանի և 2-րդ սպայական գումարտակի 4-րդ վաշտի աշխատակիցները, 4-րդ վաշտի հրամանատար Սերգեյ Հակոբյանի գլխավորությամբ: 

Մահացածներին Վազ 21013-ից դուրս են բերել ԱԻՆ Հայաստանի փրկարար ծառայության Գեղարքունիքի մարզի փրկարարները, տեղի բնակչության օգնությամբ: 

Արդեն դեպքի վայր են ժամանում ոստիկանության ՔԳՎ Գեղարքունիքի մարզի քննչական բաժնի օպերատիվ քննչական խումբը: Փաստի առթիվ ոստիկանության ՔԳՎ Գեղարքունիքի մարզի քննչական բաժնում հարուցվել է քրեական գործ` ՀՀ քրեական օրենսգրքի 242 հոդվածի, 3-րդ մասի հատկանիշներով: 

Լուսանկարները և տեսանյութը` Գագիկ Շամշյանի:

{gallery}shamshyan/avtovtar-gegharkunik-3{/gallery}