Արգիշտի Քյարամյանի հրամանով ՔԿ հնաբնակներից աղմկահարույց հանցագործություններ բացահայտած Մհեր Վարդանյանը նշանակվել է Երևանի քննչական վարչության պետ

SHAMSHYAN.com-ի տեղեկություններով՝ այսօր՝ հոկտեմբերի 12-ին, Հայաստանի քննչական կոմիտեի նախագահ Արգիշտի Քյարամյանը հրամաններ է ստորագրել։ Ինչպես հայտնում է ֆոտոլրագրող Գագիկ Շամշյանը, Ա. Քյարամյանի հրամանով՝ արդարադատության առաջին դասի խորհրդական Մհեր Վարդանյանը նշանակվել է Հայաստանի քննչական կոմիտեի Երևան քաղաքի քննչական վարչության պետ։  Քննչական կոմիտեի նախագահի մեկ այլ հրամանով՝ Մ. Վարդանյանն ազատվել է ՀՀ քննչական կոմիտեի հատուկ հանձնարարությունների, կազմակերպական-վերլուծական և քրեագիտական գլխավոր վարչության պետի պաշտոնից։ Ա. Քյարամյանի մեկ այլ հրամանով նշված պաշտոնում է նշանակվել Անրի Վարդանյանը, ով մինչ այդ աշխատում էր Երևան քաղաքի քննչական վարչության պետ։ Մ. Վարդանյանը քննչական ապարատի հնաբնակներից է։

Թե իր գործընկերների, թե փաստաբանների կողմից ու իրավապահ համակարգում համարվում է ամենապրոֆեսիոնալ կադրերից մեկը։ Հայտնի է իր սկզբունքայնությամբ և մարդկային բարձր հատկանիշներով։ Որտեղ էր աշխատել է՝ թե քննիչ, թե քննչական բաժնի պետ, թե մարզային քննչական վարչության պետ, միշտ ունեցել է բարձր ցուցանիշներ, բացահայտել է բազմաթիվ աղմկահարույց հանցագործություններ, այդ թվում՝ հանրապետությունում հայտնի անձանց նկատմամբ կատարված մահափորձեր, ավազակային հարձակումներ, այդ թվում՝ կազմակերպված բանդաների կողմից։